Doenia 22 September 1923

SinPo.id -Tractaat Versailles.
Dalem The Times tanggal 14 Agustus, Sir Jones Simon ada toelis satoe soerat kiriman bitjara[1]ken tentang orang Fransch dan Belg poenja mendoedoekin Ruhr. Ia teroetama oendjoek herannja bahoewa sedeng orang Fransch dan Belg soeda doedoekin Ruhr sadjek tanggal 11 Januari, kenapa baroe di tanggal 11 Augustus Lord Curzon seboet dalem notanja pada Frankrijk dan Belgie, „Pamerentah Radja Inggris belon pernah semboeniken marika poenja pendapetan bahoewa Frankrijk dan Belgie poenja perboeatan mendoedoekin Ruhr, salaennja tentang berfaedahnja masi djadi satoe pertanjahan, tida mendapet perkenannja Tractaat (Versailles).’’ Dengen sabenernja moesti ditanja, kaloe pamerentah Brittannie bilang belon pernah semboeniken itoe pendapetan, kapan itoe pamerentah soeda pernah teroes terang oetaraken dengen officieel ? Dalem ini hal roepanja pamerentahannja Bonar Law seperti djoega pamerentahannja Baldwin tida bisa tida dipersalahken. Dan sebagimana marika taoe ini hal ada besar tersangkoetnja dan achirnja toch tida oeroeng moesti berteroes terang, alesan tentang koeatir bikin Frankrijk dan Belgie djadi koerang senang tiada bisa dianggep koeat boeat satoe oeroesan begini besar dalem politiek. Tapi djoega, sebaliknja, djadi timboel pertanjahar, kaloe itoe perboeatan mendoedoekin Ruhr ada melanggar itoe Tractaat, kenapa boekan tjoema Brittannie hanja Italië dan jang laen-laen poen soeda tinggal diam?

Koerang Terang Djadi Berbahaja.

M. Poincare soeada ambil tindakan sasoedanja Confrentie di Paris tida' berhasil dan sasoedanja ia dapet kapastian dari Commissie Pemberesan, bahoewa menoeroet ini commissie poenja poetoesan Duitschland soeda bikin perlanggaran dengen sengadja. Dalem itoe Tractaat poenja Annex Paragraaf 18 berhoeboeng dengen Duitschland poenja perlanggaran ada dibilang seperti brikoet:

* Dalem tindakan-tindakan jang Negri Sariket nanti ada hak boeat goenaken, apabila Duitschland bikin perlanggaran dengen sengadja, dan jang Duitschland moefakat aken tida anggep sebagi perboeatan memperangin, ada termasoek perlarangan dan perampasan jang bersifat economie dan financie dan djoega laen-laen, tindakan jang pamerentah pamerentah Negri Sariket anggep perloe diambil dalem soeatoe keadahan. (The measures which the Allied and Associated Powers shall have the right to take, in case of voluntary default by Germany, and which Germany agrees not to regard as acts of war, may include economy and financial prohibitions and reprisals and in general such other measures as the respective Governments may determine to be necessary in the circumstances).

M. Poincare dan M. Thunis kaliatan soeda manjender pada ini punt dalem itoe Tractaat boeat bertindak doedoekin Ruhr, satoe tindakan jang sekarang ternjata ada meroegiken kapentingannja Brittannie. Dalem itoe Tractaat tida ada diseboet tentang boleh mendoedoekin daerah Duitsch, katjoeali itoe daerah Rijn boeat lamanja limabelas tahon sebagi pertanggoengan boeat pembajaran Pemberesan. Tapi itoe perkatahan „djoega laen-laen tindakan jang pamerenta-pamerenta Negri Sariket anggep perloe diambil dalem sasoeatoe keadahan," bisa diartiken loeas hingga barangkali tida ada watesnja. Kaloe sekarang Frankrijk dan Belgie anggep Duitschland soeda sengadja bikin perlanggaran dan boeat hoekoem itoe perboeatan anggep perloe' doedoekin Ruhr, menoeroet boenjinja itoe bagian dari Tractaat, Duitschland „moesti moefakat aken tida anggep sabagi perboeatan memperangin.” Kamoedian kaloe Commissie Pemberesan tetepken lagi Duitschland soeda sengadja bikin perlanggaran poela, M. Poincare nanti anggep perloe boeat madjoe lebih djaoe aken doedoekin Berlin, dan Duitschland sateroesnja moesti moefakat aken anggep itoe sebagi memperangin. Boenjinja itoe paragraaf ada begitoe tida definite hingga sasoenggoenja ada berbahaja.

Kadoedoekan Europa.

Orang djangan loepa bahoewa Tractaat Versailles soeda dikarang oleh Negri Sariket poenja otak-otak jang terkenal paling oeloeng dalem doenia politiek. Itoe Tractaat soeda dibikin maski teroetama boeat kaoentoengannja negri-negri jang soeda menang perang, tapi djoega boeat mendjaga perdamian dan keamanannja Europa dan laen-laen bagian dari doenia jang dengen direct atawa indirect ada berhoeboeng sama politiek Europa. Itoe Tractaat soeda beroesia ampat tahon lebih, tapi keadahan di Europa masi kaloet' seperti sediakala kaloe tida maoe dibilang lebih. Tentang panetepan daerah-daerah di Europa centraal dan Timoer jang djoega djadi bagian penting dari itoe Tractaat sampe sekarang masi djadi perkara jang mengantjem perdamian Europa. Sabentar-bentar awan di itoe bagian dari Europa djadi mendoeng lantaran soewal daerah. Kadoedoekannja negri-negri baroe jang Negri Sariket soeda bantoe diriken dengen maksoed aken djadiken pakoe-pakoenja perdamian, bebalik kaliatan ada lebih mengantjem bagi perdamian, kerna di daerah-daerah jang sekarang ditempatin oleh itoe negri-negri baroe ada lebih banjak persediahan tentara bila dibandingken dengen waktoe doeloe. Dan sekarang antara Brittannie di satoe fihak dan Frankryk dan Belgie di laen fihak djoega djadi samingkin banjak perselisihan jang itoe Tractaat kaliatan aken tida bisa menoeloeng. Kita liat betoel sekali pendapetannja bebrapa criticus, bahoewa pokonja perkara ada di Traetaat Versailles dan sasoeatoe pemberesan tjoema bisa berhasil kaloe dimoelai dari itoe poko

Keadahan di Duitschland.

Roeboehnja pamerentahan Dr. Cuno, sabagimana orang tentóe masi inget, ada dari berdjangkitnja kakaloetan di Duitschland berhoeboeng dengen toeroen kerasnja koers mark jang sanget menggontjangken keadahan. Tapi sekarang koers mark soeda djaoe lebih roesak dari itoe waktoe. Satoe milliard boeat satoe pond Inggris, boleh dikata itoe oewang Duitsch soeda tida ada harganja. Warta-warta jang blakangan ada mengabarken, kariboetan-kariboetan jang masi teroes berdjalan dan kaoem Communist masi bakerdja keras. Roepanja keadahan di ini masa tida kalah kaloet dari waktoe Dr. Cuno terlempar. Orang banjak bilang dengen oendjoek katèrangan-katerangan bahoewa jang membikin koers mark djadi begitoe toeroen adalah kaoem reactionair, jaitoe kaoem industrialist. Herr Stresemann jang djadi Kansellir sekarang ada dari kaoem Rahajat dan ada mewakilin itoe kaoem industrialist. Kaloe betoel merosotnja koers mark ada hal jang diinginken oleh kaoem industrialist dan kakaloetan di Duitschland ada dari lantaran roesaknja koers mark, keangkatannja Herr Stresemann ada satoe perkara jang mengheranken djoega. Apatah dengen samingkin roesaknja koers mark pamerentahannja Herr Stresemann bisa berdiri djedjak, djoega ada mendjadi satoe soewal.

Griekenland dan Italie.

Perselisihan antara Italië dan Griekenland sekarang ada harepan aken djadi tida berbahaja seperti doeloean. Poetoesannja Conferentie Gezant-gezant kaliatan ada banjak menoendjang permintahannja Italië pada Griekenland, dan pamerentah Griek lebih doeloe soeda njataken boeat trima baek poetoesannja itoe persidangan jang dianggep bakal neutraal. Orang Griek roepanja tida bisa berboeat laen dari loeloesken itoe bebrapa permintaan jang dimadjoeken oleh Italië dan lakoeken bebrapa hal jang marika doeloean anggep meroesakin Griekenland poenja kahormatan. Samentara itoe papreksahan dengen dipimpin oleh satoe orang Japan aken selidikin itoe perkara pemboenoehan aken dilakoeken sedikit blakangan. Begimana doedoeknja perkara jang bener, siapa-siapa adanja jang mendjadi pemboenoe, ada tersangkoetnja tida itoe pemboenoehan dengen pamerentab Griek, ada tidanja laen element jang tjampoer tangan kerna ingin api paperangan berkobar poela di itoe bagian dari Europa, samoea belon bisa dikataoei sekarang. Tapi orang Griek moesti lebih doeloe mengakoe bersala dan lakoeken apa jang soeda diminta oleh Italië dan lakoeken apa jang soeda diminta oleh Italië dan poetoesan Conferentie Gezant-gezant. Demikianlah satoe negri jang lebih ketjil dan lebih lemah moesti trima dan mengarti jang ia poenja kadoedoekan ada di seblah bawah.