Unificatie ka atas atawa ka bawah?
DOELOE jalah waktoe oeroesan gelijkstelling bangsa Tionghoa rameh dibitjaraken banjak orang njataken kainginannja persamahan ka atas atawa unificatie naar boven. Djoega Mr. Fromberg almarhoem perna bitjaraken ini soeal persamahan tentoe sadja bisa diadaken ka doea djoeroesan, jalah ka atas atawa ka bawah.
Persatoean ka atas, jalah kaloe jang digolongan bawah dinaekin „pangkat” dan disamaken kadoe doekannja seperti golongan atas. Persatoean ka bawah djoega bisa, jalah kaloe golongan atas ditoeroenken pangkatnja dan dikasi kadoedoekan sama-rata dengen golongan bawah.
Kaloe djongos jang biasa mengglepok di batoe dikasi doedoek korsi bersama si toean, inilah „unificatie naar boven” atawa persamahan ka atas. Tapi kaloe si toean disoeroe toeroen dari korsi dan moesti toeroet mengglepok di batoe dingin, inilah jang dinamaken „unificatie naar beneden” alias persamahan ka bawah.
Berhoeboeng dengen ”niatan” paling blakang dari pamerentah boeat „nanti" kasi persamahan pada bangsa Tionghoa ini soeal baek djoega dibitjaraken sedikit.
Kaloe doeloe orang Tionghoa berkaok-kaok minta persamahan marika selaloe maksoedken unificatie ka atas, jalah oepama dalem oeroesan pengadilan marika diperlakoeken sama-rata dengen bangsa koelit poeti dan begitoepoen dalem oeroesan pendjara, enz. enz.
Sekarang orang Tionghoa moesti madep landraad, dalem pendjara dapet ikan asin, kaloe maoe dipreventief kliwat gampang, kaloe maoe masoek sekola Eur. Lag.
School moesti masoek rekest enz. Dengen minta glekstel marika harep bisa tida oesa „katemoeken lagi” landraad, bakal dapet daging dan sop snert di pendjara, tida gampang dipreventief, enz.
Tapi apa ini bakal kadjadian? Boleh djadi, tapi amat boleh djadi djoega tida. Boleh djadi kita bakal ngalamken unificatie naar beneden, hinga toean Van Bauve boleh boeroeboeroe toekar namanja djadi Van Beneeje.
Jalah orang Europa bakal di[1]hadepken di pengadilan jang lebih rendah oepama landraad dan sebaginja. Bisa djadi aken diadaken atoeran begitoe roepa, hingga perkara perkara ketjil semoea aken dipreksa oleh landraad boeat semoea persakitan, tida perdoeli koelit poeti, koening, item, kopi .soesoe atawa poen vermillioen.
Perkara-perkara „besar” semoea dipreksa oleh Raad van Justitie. Seperti orang taoe perkara-perkara ketjil sekali boeat semoea bangsa dipreksa oleh landrechter dan dalem pengadilan paling bawah djadinja soeda ada persamahan dalem principe (dalem practijk masi sering belon).
Persamahan boeat orang Tionghoa boleh djadi bakal berarti jang ini persamahan jang soeda ada di pengadilan paling rendah aken diteroesken sampe di pengadilan paling tinggi boeat semoea bangsa.
Dengen laen perkatahan golongan Indonesiërs djoega djadi bakal dipersamaken haknja bersama-sama orang Tionghoa.
Sekarang oeroesan preventief dan pendjara; dalem oeroesan preventief brangkali bakal diadaken samatjem unificatie ka atas, jalah selandjoetnja kamerdikahan orang Timoer bakal lebih banjak dilindóengken oleh wet.
Dalem perkara pendjara bisa djadi orang bakal goenaken systeem liat perkaranja. Ini memang paling logisch dan paling adil. Pendjahat-pendjahat besar oepama semoea dimasoékin dalem satoe pendjara tida perdoeli ia ada bangsat koelit apa.
Sebaliknja persakitan-persakitan pantes (oepama journalist-journalist jang dipendjara boekan sebab membangsat tapi sebab oeroesan persdelict atawa pendjahat-pendjahat politiek) diperlakoeken sama pantesnja tida perdoeli ia dari bangsa apa.
Di Europa dan laen-laen negri sopan soeda lama-sekali pendjahat politiek dapet perlakoean speciaal dan prestige pamerentah di sini pasti bakal naek, kaloe ini toeladan ditoeroet. Apa kaloe soeda diadaken ini matjem persamahan, pendoedoek lantas djadi poewas?
Ini tida oesa diharep; tida ada pendoedoek negri jang ”poewas” dimana poen. Di Nederland, di Zwitserland, di Amerika Sariket atawa dimana sadja pendoedoeknja tida poewas 100%. Indonesia pasti tida bakal djadi katjoeali Shang Shia
_____
EGOÏSME.
Saorang tanja perkatahan mana jang paling sering digoenaken. Jang satoe seboet perkatahan “Tjinta”. Jang satoe lagi kata “Makan” Jang katiga séboet “Oewang” Jang ka-ampat anggep “Prampoean" Jang kalima kata “Akoe”
