Padi toemboe tida bersoeara.
,,ONHOORBAAR groeit de padi”
(„Padi toemboe zonder bersoeara”), begitoelah ada motto dari kaoem Indonesia Raja jang dengen penoe kapertjajahan anggep pasti satoe tempo marika poenja padi Indonesia bakal djadi besar dan bikin kaget si Dogol jang tida ,,denger” ia toemboe.
Begitoepoen aliran jang sehat antara orang Tionghoa bakal toemboe zonder banjak gembar gemboran, zonder banjak conferenties dan prae-advizen jang sering ternjata tjoema „veel geschreeuw, weinig wol”.
Soeda beroelang-oelang kita oendjoek kadoedoekan orang Tionghoa disini bisa diliat dari pamandangan politiek dan dari pemandangan economie.
Dalem pemandangan politiek nasib orang Tionghoa di Indonesia dan diseloeroe doenia teroetama bergantoeng pada Tiongkok.
Deradjat politiek dari orang Tionghoa diantero doenia teroetama bergantoeng pada deradjat politiek dari Tiongkok.
Dalem oeroesan economie orang Tionghoa moesti berdaja sendiri dalem „struggle for life” jang tida kenal kesian dan memang gelo boeat harepin pertoeloengan Tiongkok dalem oeroesan economie, tapi ada lebih idioot lagi boeat kira bahoea segala Volksraad, enz. bisa „toeloeng” bikin baek economie dari orang Tionghoa disini.
Biarpoen Volksraad kasi orang Tionghoa tanah perdio, brikoet patjoel dari mas dan bon boeat pesan makanan pada Hotel des Indes tiga boelan kaloe orang Tionghoa sendiri tida maoe goeloeng tangan badjoe dan takoet atawa ,maloe" kerdja, semoea aken pertjoema sadja.
Dalem weekblad „Sin Po” No 321 kita soeda oendjoek bagimanam orang moesti bladjar memandang dengen sedikit loeas dan djangan per s e maoe mati idoep disini sadja.
Kita toelis itoe koetika: „Kaloe disini bisa oentoeng dan madjoe, ja itoe memang bagoes sekali dan kaloe begitoe tida maoe pergi lagi dari sini djoega tida djadi apa; tapi kaloe di sini ..........soesa bernapas tida djahatnja kaloe orang tjari peroentoengan di laen negri atawa binoewa, oepama antara laen-laen di Tiongkok”.
