Tjap „Tjina”.

PERKATAHAN „Tjina” sendiri sabenernja tida menggenggem maksoed menghina atawa koerang baek. Tetapi lantaran di dalem tempo blakangan di Indonesia orang sering hoeboengken itoe perkatahan pada perboeatan-perboeatan koerang baek, atawa digoenaken oentoek menjindir dan mengolok-olok, maka di telinga orang Tionghoa djadi tida sedep kadengerannja.

Sadjek di permoelahan ini abad kita-orang goenaken seboetan Tionghoa boeat kita-poenja kabangsahan. Boekan sadja ini ada lebih lemas, hanja poen seboetan ini memang ada lebih bener. Sadjek ahala Tjioe, kira-kira 3000 taon doeloe, bangsa kita soeda goenaken seboetan Tionghoa.Pada ampat taon jang laloe mr.

Chiang Yu Pin menoelis di dalem madjalah Hsin Tsing Jlien jang terbit di Shanghai, di mana antara laen-laen ia bilang, itoe seboetan Tjina jang orang asing goenaken terhadep kita adalah berhoeboeng dengen keangkerannja Tiongkok di djeman dynastie Tjien (2000 taon sabelon ada itoengan Mesehi)..

Tiap orang Tionghoa doeloe poen merasa bangga boeat seboet dirinja satoe Tjina. Saja inget, di dalem Tiong Kok Lik Soe jang digoenaken oleh roemah sekola Tiong Hoa Hak Tong pada djeman sabelon Republiek Tiongkok terlahir, ada ditoetoerken tentang kamadjoeannja Tiongkok di djeman Tjien.

Orang-orang Tionghoa banjak djoega jang mengoembara ka loear negri. Marika njataken kadatengannja dari negri Tjien dan iaorang ada rahajat Tjien atawa Tjina. Ternjata ini seboetan dari djeman riboean taon doeloe tatkala negri kita sedeng djaja, teroes idoep sampe sekarang. Malah di Java perkatahan itoe saolah-olah meroepaken satoe tjap jang terdapet dimana-mana... Di dalem sedjarah, di kota-kota, nama-nama barang, dedaonan, logam dan laen-laen poela orang senantiasa katemoeken perkatahan...... Tjina.

Kita tida oesa seboetken disini, bahoea soeda sadjek doeloe kala kampoeng-kampoeng Tionghoa ada terkenal dengen seboetan kampoeng Tjina atawa Patjinan, saroepa dengen tempat tinggalnja orang Kodja jang dinamaken Pakodjan. Tetapi dengen sasoenggoenja perkatahan „Tjina” itoe ada „berakar” lebih dalem di ini kapoeloan, dan mempoenjai hoeboengan lebih rapet, jang tida terdapet pada bangsa laennja.

Marilah setjara sapintas-laloe kita bikin penjelidikan. Kapan kita boeka lembaran boekoe Sedjara Tanah Djawa, atawa, jang di kalangan Priboemi dikenal sebagi Babad Pedjadjaran, kita lantas katemoeken...... Poetri Tjina. (Djoega ada Serimpi jang dinamaken „Serimpi Poetri Tjino”).

Ini Poetri Tjina ada selirnja Praboe Browidjojo, radja dari Modjopait jang terkenal. Dari selir ini radja terseboet dapetken satoe poetra lelaki jang dikasi nama Raden Patah. Ini poetra dilahirken oleh iboenja di Palembang, kamoedian kombali poela ka Java.

Sasoeda bergoeroe pada Soenan Giri dan Soenan Ngampel, ia angkat dirinja mendjadi Sultan di Bintoro (Demak), serta djadi pengandjoer dari igama Islam. Mesigit Demak jang amat tersohor di kalangan Islam poen ada oesaha dari Sultan Bintoro (Raden Patah). Tatkala pada taon 1921 saja tinggal di Cheribon, pada soeatoe hari saja perna diadjak oleh satoe kenalan koendjoengin koeboerannja...... Poetri Tjina di Goenoeng Djati.Djoeroe-koentji (pendjaga) koeboeran itoe ada menerangken, bahoea Poetri Tjina itoe ada salasatoe selir dari Sultan Cheribon. Ini poetri tentoe sadja ada laen poetri dari jang diambii oleh Praboe Browidjojo.

Koeboeran Poetri Tjina itoe ada dibikin sebagimana koeboerannja orang jang berigama Islam, jaitoe pake kidjing atawa maesan. Orang jang maoe koendjoengin koeboeran itoe, sabelon masoek ka dalem roeangan, lebih doeloe diminta lepas sepatoenja. Di sakiternja koeboeran itoe ada terdapet goetji-goetji Tiongkok, vaas-vaas Tiongkok jang indah, dan piring-piring Tiongkok djeman koeno.

Di deket koeboeran ada terdapet sepasang tjik-tay (kandelaar), serta satoe hio-louw (tempat aboe). Orang Tionghoa jang maoe sembahjang, boleh pasang hio-swa sebagimana kita-poenja peradatan. Tetapi kapan maoe njekar sadja, seperti tjaranja orang Islam jalah taro kembang-boreh, poen boleh.