Iapoenja poetra jang kaja
SEBAGI djoega dl bilangan Tangerang dan sakiternja, demikian poen di bilangan Tjiawi - gebang dalem residentie Cheribon ada terdapet banjak bangsa Tionghoa jang mendjadi pa tani dan mengoesahaken taneman bawang dan tembako. Tatkala itoe sang hari soeda moelain menggerib tempo toean Kwa Oen Tjiang, sala saorang pa tani djoega, berdjalan poelang seabisnja ia tengok taneman kebon bawangnja.
Bawang-bawang ini toemboe dengen amat soeboer dan moelain katanja hendak,,boeka kaki”. Pemandangan begini memang selaloe membjkin amat beroentoeng dan kaja dalem pengrasahannja saorang pa tani, melebihken dari saorang toean toko jang banjak oewang dan harta bandanja.
Dengen tida perna merasa bosen si pa tani bisa mengawasin kebon tanemannja dengen sorot moeka girang, keadahan di sakiternja ada soenji senjap saolah-olah alam poen tida ingin ganggoe kasenangan. dan katentremannja. Di sitoe ia meliat hasil dan boewah pakerdjahannja, dari hasil kringet dan kakoeatan tenaga bekerdjanja.
Itoelah sebabnja ma-ka di itoe sore ia kaliatan lebih girang, lebih goembira dari pada biasanja. Koetika dalem roemah orang poen telah memasang lampoe, toean Kwa Oen Tjiang berkata begini pada istrinja: „Kita poenja taneman kebon bawang toemboenja soeboer sekali dan soeda pada moelain mekar di bawahnja aken boeka kakinja.” Dan di parasnja itoe orang toea tertampak tsorot berrseri-seri, kamoedian ia poeloeng roko daon arennja. „Soekoerlah pada Toehan,” saoet sang istri tapi kamoedian dengen soeara doeka ia landjoetken bitjaranja, „tjobalah kaloe si O Tong dia baek-baek bantoe kerdja sama orang-toea di sini, masatah dia djoega kaga senang.”
„Aaach, si O Tong anak kaga soeka denger orang-toea poenja kata dan .dia ingin idoep besar, maoe pergi ka kota, tida taoe di sana poen masa kakoerangan orang jang pinter,” saoet toean Kwa jang sekarang kadengeran soearanja mengoetaraken tida senang. „Nah sampe sekarang soeda djalan tiga taon ka sinihin, mana dia ada kabar tjeritanja atawa ada soerat-soeratnja, djangan sentara ia bisa kirimin sedikit doewit sama orang toea.”
Toean Kwa Oen Tjiang keboelken asep rokonja. Dan jang dipanggil si O Tong jalah Hok Tong, poetra lelaki satoe-satoenja dari familie Kwa. Pada bebrapa taon jang laloe ia tinggalken Tjiawi-gebang aken katanja maoe pergi 'boeat tjari peroentoengannja ka Semarang dan seperti di atas ditjeritaken, ia lantas tida kadengeran poela kabar tjeritanja.
Sakoetika lamanja kadoea orang toea ini tida ada jang bitjara poela saolah-olah ini peringetan pada sang anak jang tida ada, timboelken pengrasahan tida senang' jang mengganggoe. Mendadak marika dibikin kaget oleh soearanja toeter auto. Boenjinja kadengeran beroelang-oelang semingkin keras, kamoedian disoe-soel oleh soeara 'tindakannja orang jang berdjalan dengen tjepet menghampirken ka djoeroesan pintoe roemahnja toean Kwa.
Tatkala toean Kwa dengen ati-ati memboeka pintoe dan melongok ka loear, di sitoe berdiri Hok Tong dengen kadoea tangannja menenteng satoe tasch koelit dan satoe bongsang berisi boewah-boewahan. O Tongļ¼” berseroe sang ajah dengen kaget.
