ECONOMIE

SinPo.id -  Semoea panjelidikan tentang economie dimoelai dari pengoesahan tanah. Bagi pemandangannja satoe astronomist ini boemi ada satoe bola besar jang terpoeter ngiterin matahari zonder ada poenja maksoed jang dikatahoei. Bagi manoesia jang permoela bakerdja tani, ini boemi ada satoe tanah loeas jang bila dioesahaken bisa kaloearin gandoem dan laen-laen barang jang boleh dimakan.

Bagi pendoedoek kota jang kabelinger ini boemi jang loeas ada kaliatan seperti medja djoedi, kaoe poenja kans dalem permaenan teroetama bergantoeng pada tempatnja dimana kaoe adoe oentoengmoe. Bagi economist ini boemi ada sematjem koeboeran dimana ada terpendam harta, dan dimana orang poenja doega-doegahan dan karadjinan soeda dibikin djadi sia-sia oleh itoe pengaroeh jang semboeniken itoe harta.

Toekang kerdja jang tjerdik dan sabar soeda kerdjaken patjoelnja atas ini boemi, dan dengen banjak soesa tjoema bisa dapetken trigoe jang djelek, sedikit oebi, banjak doeri, dan bebrapa roepa daon jang bisa semboehin loeka.

Orang jang pemales doedoek di satoe oedjoeng dan dengen menganggoer awasin pasir jang mengkredep kasorotan sinar matahari, sakoenjoeng-koenjoeng ia mendoesin bahoea ini boemi ada kasi mas padanja — dengen roman sekaker ia laloe poengoet itoe.

Laen orang, selagi asik mentjari itoe mas jang gilang-goemilang, dapetken banjak areng batoe, atawa soember minjak tanah. Demikianlah manoesia diboeat maen oleh ini Boemi jang sebagi sang iboe, dan tida taoe, tatkala ia bedol tangannja itoe sang iboe, bahoea itoe tangan ada mengepel diamant atawa batoe api, gandoem merah jang bagoes atawa kole jang koeroes.

Demikianlah ia djadi seperti pendjoedi, dan merasa djemoe pada theorist-theorist jang gembrengin prihal karadjinan, kadjoedjoeran dan sama rata.

Tapi manoesia selaloe maoe melawan nasibnja. Kerna dalem perdjoedian orang jang banjak moesti kalah boeat bikin orang jang sedikit djadi menang: kerna tentang berlakoe tida djoedjoer ada seperti menangkep bajangan kaloe sasoeatoe orang soeda biasa berlakoe padan; dan kerna tentang tida sama rata ada dirasaken getir oleh semoea katjoeali jang paling menang sendiri, manoesia lantas ada poenja kainginan keras soepaja itoe pengasih-pengasih jang tida tentoe dari Natuur bisa diatoer oleh seroepa agentschap jang ada poenja pengaroeh dan hati baek boeat bagiken itoe pengasih-pengasih pada orang-orang jang toeroet mentjari dengen tjara adil mengimbangin masing masing poenja djasa atawa pakerdjahan.