Pakerdjahan insinjor paling besar di doenia

SinPo.id -TENTOE sadja, di Amerika Sariket! Kliroe, sebab pakerdjahan ingenieur jang paling besar dikolong- langit sekarang dilakoeken di Sovjet-Rusland dan boekan di Amerika Sariket jang toch dalem techniek terkenal sebagi paling dijempol.

Tapi Sovjet-Rusland! jang merah dalem ini hal soeda bisa lombaken Amerika Sariket dalem tempo pendek sekali.

Pakerdjahian ingenieur jang paling besar dilakoeken di bawah Plan 5 taon dari Rusland, di soengei Dnjepr dimana lagi dipasang fabriek liestriek dengen kakoeatan dari 2.500.000.000 K.W.U. !

Boeat ini centrale liestriefc raksaksa („Djneprostroy”) ini soengei Djnepr moesti diipasang dam (bendoengan) jang tida ada bandingannja dimana poen.

Ini dam ada djiaoe lebih besar dari Wilson-dam jang; tersohor dari Muscle Shoals di Amerika Sariket.

Dam jang pamerentah Rus soeroe bikin pandjangnja lebih, dari satoe mijl dan tingginja ada ...60 meter !

Boeat bikin ini dam telah digoenaken tida koerang dari 1.150.000 Meter kubiek beton, jalah satoe record doenia.

Dan ini pakerdjahan dilakoeken begitoe poenja tjepet, hingga bikin petja record Amerika Sariket.

Waktoe orang Amerikaan pasang Wilson-dam dalem satoe boelan iaorang perna goenaken 53.000 Meter kubiek beton dan ini ada record boeat doenia, tapi dalem boelan October 1930 di Dnjepr koeli-koeli Rus telah goenaken tida koerang dari 110.900 Meter kubiek beton! Atawa record Amerika dan record doenia dipetjaken dengen doea kali lipet.

Bagimana besarnja pakerdjahan orang Rus waktoe bikin ini centrale liestriek poen ternjata dari sedikit angka-angka di bawah ini:

Jang bekerdja di sitoe sama sekali ada 17.000 koeli dibantoe dengen 30 kraan masin (masing-masing dari 40 ton), 10 kapal kedoek, 50 locomotieven, 80 strotkranen....... semoea bikinan Amerika jang paling modern.

Di sitoe poen dipasang 9 turbines raksasa dari masing-masing 90.000 kakoeatan koeda (PK) atawa; berame dengen tenaga 810.000 PK!

Rusland sekarang ada negri dimana pakerdjahan techniek jang paling besar lagi dilakoeken dan banjak orang Amerikaan jang medang soeka „pakerdjahan besar” telah pergi ka Rusland boeat bantoe orang Rus lakoeken itoe plan 5 taon teroetama sebab soeka boeat „bekerdja besar” dan boekan boeat dapet doeit sebab marika ada, tjoekoep kaja. Centrale liestriek „Djneprostroy" baroe sala satoe pakerdjahan sadja dari Rusland poenja industrialisatie dan djoega di laen – laen tempat orang Bolsjevist lagi bekerdja keras boeat diriken fabriek-fabriek jang begitoe poenja besar, hingga antaranja ada jang tida ada bandingannja di doenia.

Lenin perna kaloearken oetjapan bahoea „Bolsjevisme boekan laen dari pamerentahan Sovjet dan electrificatie".

Centrale liestriek „Dnjeprostroy” sekarang terangken apa maksoednja ini oetjapan dari radja Bolsjevist!

?Krachtstation liestriek besar jang sedeng dibikin di Rusland (Djneprostroy). Kaloe rampoeng ini centrale liestriek piling besar di doenia mempoenjai kakoeatan dari 2.500.000.000 K.W.U.!