Gymnastiek boeat orang prampoean，

DALEM „Die Umschau” (Jahrg. 33, Heft 15) Prof. Dr.，H. Sellheim ada bitjaraken oeroesan gymnastiek boeat orang prampoean dan bebrapa bagian dari itoe toelisan ada tjoekoep penting boeat dipetik di sini.

Di ini djeman di Barat orang prampoean kaliatan maoe tiroe lelaki dalem segala hal dan djoega dalem oeroesan sport marika kaliatan tida maoe katinggalan. Doeloe orang prampoean tida kenal sport atawa gymnastiek, tapi sekarang iaorang maoe lakoeken apa sadja jang lelaki lakoeken.

Apa ini ada baek ada laen perkara. Gymnastiek memang baek, tapi segala apa kaloe dilebih-lebihken atawa digoenaken setjara semrbrono bisa berbalik djadi tida baek.

Prof. Sellhemi anggep orang prampoean poenja „pakerdjahan” paling penting, jalah mendjadi iboe. Menoeroet ia sasoeatoe prampoean ada satoe iboe jang „latent” dan tjoema satoe iboe ada saorang prampoean jang sampoerna.

Lantaran ini, orang moesti djaga baek kasehatan orang prampoean. Pergerakan badan jang bisa bikin badan prampoean djadi lebih sehat dan koeat haroes dipoedjiken, tapi sebaliknja semoea pergerakan jang membahajaken orang prampoean poenja badan moesti didjaoeken.

Orang sering liat orang prampoean diadjak oleh sobatnja atawa toendangannja boeat doedoek di blakang motorfiets jang bergontjang keras.

Ini - gontj ang-gontjangan tida baek boeat kasehatannja orang prampoean. Siapa jang kenal anatomie dari badan prampoean merasa kaget kaloe liat orang prampoean „dikotjok” di blakang motorfiets, kata penoelis terseboet.

Orang haroes taoe banjak penjakit prampoean djoestroe terbit lantaran bagian peroetnja terlaloe terkotjok atawa tergojang. Berhoeboeng dengen ini toelisan, kita inget lagi bagimana bebrapa taon berselang satoe weekblad Blanda terkenal, jalah „De Amsterdammer” (dari 9 April 1921) telah adaken satoe enquette boeat tanja pendapetannja bebrapa orang prampoean ternama apa baek tida kaloe orang prampoean maen ..........voetbal.

Banjak sekali orang prampoean ternama sebagi Dr. Catharina van Tussenbroek, Top Naeff, Dr. Marie Fredeldy dan Catharina van Rennes jang njataken iaorang poenja tida setoedjoe dan sebagi salah satoe alesan ada dimadjoeken ba[1]hoea itoe permaenan ada terlaloe 'kasar dan tida soeroep boeat orang prampoean.

Jang ini alesan boekan alesan kosong sadja jang sentimentel bisa ternjata dari toelisan Prof. Sell-： heim di atas. Orang jang maoe djadi goeroe gymnastiek dari orang prampoean dari itoe boekan sadja moesti pande lontjat, lari atawa demikian, tapi ia poen wadjib taoe betoel keadahan orang prampoean soepaja ia tida soeroe orang prampoean lakoeken gerak-gerakan badan jang tida baek boeat marika.

BOEMI.

Sir James Jeans, F.R.S., telah toelis satoe boekoe pada baroe ini dengen alamat „The Universe Around Us” jang diterbitken oleh Cambridge University Press. Ini boekoe jang menoetoerken alam ada dimaksoedken boeat pembatja oemoem. Dalem itoe boekoe ada dibitjaraken tentang kita poenja boemi jang menoeroet rekenan astronoom sampe sekarang soeda beroesia 2,000,000,000 taon. Sadjek ada barang idoep di boemi sampe sekarang soeda 300,000,000 taon.

Moentjoelnja manoesia di boemi djoega soeda lama, jaitoe 300,000 taon. Oemoernja ilmoe alam atawa astronomie soeda 3,000 taon. Orang pertama bisa bikin telescoop jaitoe teropong peranti liat bintang sampe sekarang soeda 300 taon. Ilmoe portret bintang (astronomische photographie) baroe beroesa 30 taon. Sajang boemi belon beroesia 3 riboe millioen taon, dan bikin angka tiga djadi angka penting dalem hikajatnja boemi berhoeboeng sama manoesia dan ilmoe alam.