Toekang terbang Hindoe.
KABALI ada priboemi Bombay dan terlahir di taon 1907. Ia termasoek dalem kaoem Cutchi Lohana dan ada anaknja satoe soedagar dan toean tanah. Ia dikirim ka roemah sekola rendah dan pernah beladjar di kias toedjoe; tapi soeda tida bisa toeroet bikin examen kerna kasehatannja tida mengidzinken. Ia brenti dari sekola di taon 1922 dan bakerdja dalem tanah ajahnja.
Ia poenja ajah meninggal di taon 1924 dan ia lantas bakerdja pada satoe firma Duitsch, Bombay Berlin Trading Co. Ini firma ada djoeal barang[1]barang kaperloean photographie dan Kabali bakerdja di afdeeling techniek.
Kenapa Kabali soeda bakerdja pada itoe firma, boekan laen teroetama kerna ia ada soeka sama photographie. Ia ada kandoeng niatan boeat pergi ka Duitschland boeat jakinin ilmoe photo, tapi kerna perdagangan moendoer ia terpaksa toenda itoe niatan.
Kabali ada satoe amateur jang pande dalem kalangan photographie. Ia telah dipilih djadi anggota boeat saoemoer idoepnja oleh Bombay Art Society. Bermoelanja ia sering kirim iapoenja bikinan photo ka saban tentoonstelling taonan dari itoe society. Ia soeda dapetken bebrapa prijs dari society terseboet.
Blakangan ia sering kirim bikinan photonja ka banjak tentoonstelling di seloeroe India, dan djoega ka negri-negri asing seperti Japan dan laen-laen. Ia telah dapetken medaille dari Madras Art Society di taon 1926. Ia poenja photo ada dihargaken di India dan teroetama di Japan tatkala dibikin International Pictures Exhibition di Yokohama.
Kamoedian ia dipilih djadi Fel[1]low dari Royal Society of Arts, London (F. R. S. A.) dan djoega Associate dari Royal Photographie Society, London (A. R. P. S.) Achirnja di taon 1928 ia djadi djoega pergi ka Duitschland, tapi boekan boeat jakinin ilmoe photo[1]graphie, hanja boeat berladjar terbang. Pertama ia masoek dalem firma Junkers jang terkenal, diDessau, dimana ia peladjarin practijknja membikin pesawat terbang.
Ia brangkat dari Duitschland di boelan October dan pergi ka London boeat jakinin meteorlogle dan ilmoe peladjaran. Dalem ini peladjaran ia bikin banjak kamadjoean dan djadi angota dari Meteorlogy and Navigation Society.
Kabali ada orang Hindoe jang pertama ditrima djadi leerling dari satoe firma peterbangan Inggris jang paling besar (Imperial Airways Ltd.). Kamoedian ia jakmin semoea tjabang tentang organiseer peroesahan paterbangan civiel, dan di boelan Maart jang laloe ia jakinin ilmoe terbang dalem sekolahan Col. Henderson dan ia loeloes dari semoea oedjian, teritoeng djoega cross-country, perterbangan tinggi dan perterbangan malem boeat dapetken licentie A dan B, dengen bikin pertjobahan pertama jang ditilik dengen officieel zonder bikin barang sedikit karoesakan.
Djoega ia soeda loeloes dalem examen bagian techniek. Ia ada orang Hindoe jang pertama dapetken sapenoehnja licentie B boeat British Air Pilot dan soeda tjoba bikin perterbangan sendirian dengen berhasil dari London ka India dengen iapoenja aeroplane enteng Feather of Dawn.
Kabali ingin madjoe lebih djaoe dalem ilmoe terbang teroetama boeat jakinin ilmoe mengoekoer tanah dari oedara dan bikin photo dari oedara. Ini aviateur Hindoe moeda jang merangkep djoega amateur fotograaf jang klas satoe ada poenja harepan jang zonder wates boeat berhasil lebih goemilang.
Silar
