Postspaarbank di Tiongkok.
Maskipoen lebih siang orang soeda dapet taoe kafaedahannja tapi hikajat ini pendirian di Tiongkok masi belon lama. Tatkala Hsu Shi Chang pangkoe djabatan minister perhoeboengan dari Pamerentah Tjeng Tiauw, ini oeroesan poen soeda perna dibitjaraken, dan sebagi tindakan permoelahan, bebrapa student telah dikirim ka Europa boeat pahamken ini pendirian, samentara oleh ministerie terseboet djoega diadaken commissie boeat mejakinin.
Tapi berhoeboeng sama loeasnja negri, berbedanja kakoeatan economie rahajat antara satoe dan laen tempat, tida adanja persatoean systeem oewang, maka ini kaniatan belon djoega bisa didjalanken. Sesampenja Binkok taon ka 7, jalah koetika Tsao Yu Lin pegang djabatan minister perhoeboengan, barcelah ini tindakan didjalanken.
Begitoelah oendang-oendang boeat postspaarbank lantas dimaloemken, dan pada tanggal 1 Juli laen taonnja (Binkok taon ka 8) postspaarbank moelai diadaken di Peking, Tientsin, Taiyuan, Kaifeng, Tsinan, Hankow, Nanchang, Nanking, Anking, Shanghai dan Hangchow. Pada tanggal 15 October di itoe taon djoega ini pendirian telah diloeasken ka laen-laen bilangan jang lebih ketjil hingga banjaknja kantoor post jang diadaken postspaarbank ada 69, dan pada tanggal 1 December itoe taon telah diloeasken lagi sampe di Tiga Frovincie Timoer. Laen taonnja Kwangtoeng dan Fukien djoega dapet giliran.
Di taon pertama kantoor post jang oeroes postspaarbank tjoema ada 81 tempat, tapi blakangan senantiasa teroes bertambah hingga di achir Binkok taon ka 12 djoemblahnia ada 358. Moelai Binkok taon ka 13, berhoeboeng sama gontjangnja keadahan politiek, banjak kantoor post telah brentiken panerimahan oewang simpenan, hingga di boentoet taon Binkok ka 17 djoemblah itoe tinggal ada 206.
Pada Binkok taon ka 18 kapala post dienst dari pamerentah Nationaal poenja Departement Perhoeboengan Liu Su Fan, dengen goenaken kasempetan tempo hadlirin Internationale post conferentie jang dibikin di Londen telah koendjoengin berbagi-bagi negri boeat pahamken oeroesan post dan satelah poelang ia lantas bikin rapport, kasi advies pada departement perhoeboengan aken adaken afdeeling sendiri jang speciaal boeat oeroes postspaarbank.
Kamoedian oleh minister Wang Po Chun ini advies disampeken pada pamerentah; di boelan Januari Binkok taon ka 19 pamerentah trima baek ini advies dan pada tanggal 15 Maart Hoofdkantoor dari postspaarbank telah didiriken. Pengloeasan teroes dilakoeken, dan sampe di boelan Juni laen taonnja (Binkok taon ka 20) banjaknja postspaarbank bertambah sampe djadi 572.
Bermoela diadaken postspaarbank tjoema ditrima Pass book Savings (sematjem giro) dengen rente 4,2 pCt. satoe taon, tapi blakangan aken bikin soepaja orang lebih goembira titipken oewangnja, rentenja telah dikasi naek sampe 5 pCt. tapi sekarang soeda ditoeroenin lagi djadi 4,5 pCt.
