Adat-istiadat dan kamadjoean.

ORANG sering denger perkara kakolotan dari bangsa Tionghoa dan adat-adat Tionghoa jang „koeno’’，dan ada orang jang bilang, asal sadja segala adat Tionghoa ”koeno” dilempar lekas-lekasnja， semoea bakal djadi beres: Tiongkok bakal djadi negri makmoer dan bangsa Tionghoa bakal sampe di poentjaknja kamadjoean.

Tapi apa sasoenggoenja betoel adat istiadatnja bangsa Tionghoa jang ”koeno” mendjadi halangan dari kamadjoean? Ini sedikitnja moesti disangsiken kaloe orang liat..........Japan! Di Japan banjak sekali adat-istiadat. koeno (jang sabagian besar ada mirip dengen adat-istiadat tionghoa koeno) jang dipegang tegoe, tapi toch Japan ada negri Timoer jang paling modern dan paling koewat!

Di Tiongkok Confucianism dioebrak- abrik sebab iapoenja kolot dan koeno, kitab Sze Soe maoe diboeang dan Oeh Ching maoe dilempar. Tapi di Japan sampe di ini djam Khong Tjoe masi teroes dipandang sebagi poedjonggo, tian adat-istidat koeno dan berabe masi didjoengdjoeng tinggi. Igama Boedha jang Japan dapet trima via Tiongkok sampe sekarang masi dipoedja oleh sabagian jang paling besar dari bangsa Japan,.dan klenteng koeno di Japan masi teroes dirawat baek, tapi toch..........

Japan bisa mendjadi negri jang madjoe dan koeat, djaoe sekali lebih madjoe dari laen negri-negri Timoer jang rnaoe lempar segala apa jang katanja koeno dan berlaga ,,modern.......... di koelit.

Di Tiongkok boekan sedikit orangorang Tionghoa pake nama-nama Europa, hingga ada si Willinton, ada si Alpred, ada si Djon dan si Liesbet. Sampe diplomaat-diplomaat Tionghoa jang termashoer ada jang pake nama Barat, tapi sabegitoe djaoe kita taoe, tida ada barang satoe diplomat Japan jang pake nama Europa; tida ada Wellington Okuma seperti di Tiongkok ada Wellington (sic) Koo, dan tida ada Alfred Tanaka sebagi di Tiongkok jang „modern”(?) ada Alfred Sze.

Koet.ika keizer Japan dikoeboer, oepatjara dan adat-istiadat jang koeno sekali masi teroes dipake, dan kreta mait boekan ditarik oleh auto, tapi oleh.......... sampi-sampi jang seperti merajap! Soenggoe ”koeno” dan „kolot, tapi toch itoe segala matjem kakoenohan dan kakolotan tida mendjadi halangan boeat bikin Japan diadi negri Timoer jang paling madjoe dan paling berpengaroeh. „Sebagi tanda peringetan itoe gempah boemi besar di Tokio, orang Japan telah diriken.......... boekan patoeng menoeroet styl kubistisch atawa futuristisch, tapi satoe patoeng Boedha besar jang indah menoeroet styl jang ”koeno”......

Dansa-dansa mesoem dari Barat terbitken reactie jang njata di Japan dan sampe ada pembesar-pembesar Japan jang prenta toetoep semoea roemah dansa begitoe. Apa ini ada sifat ”koekoeh” dan „kolot”，atawa apa ini djoestroe ada satoe boekti cultuur Japan jang toea masi hidoep dan koeat, dan ada kapertjajahan pada diri sendiri boeat toelak pengaroe dari loear jang tida di-inginken dan tida maen „trima” sadja segala apa jang masoek sebagi vuilnisbak ?

Betoel Japan banjak djoega robah adat-adat jang tida tjotjok lagi dengen kaadahan djeman, tapi ia tida berlakoe tjerebo dan sembarangan, hanja bedahken betoel apa jang moesti ambil over dari Barat dan apa jang ia moesti toelak! Dalem banjak hal bangsa Japan masi djaoe lebih „koekoeh",”kolot” dan ”koeno” dari bangsa Tionghoa, tapi toch iaorang djaoe lebih madjoe dari orang Tionghoa, hingga baekorang pikirken dimana sebabnja jang lebih penting dari lambatnja Tiongkok poenja kamadjoean, sebab terang sekali orang tida bisa maen lempar antero kasalahan diatas poendaknja „kakoenolian”!