Koeping anak ketjii.
Satoe tjerita pendek
HIAP GIE soeda bekerdja djangkep lima taon lamanja dalem toko barang makanan dan minoeman dari Ong Sien Tjay en Zonen. Djarang-djarang, kaloe boekan jang tebal koepingnja dan kliwat sabar hatinja, bisa bekerdja begitoe lama seperti kita poenja pamoeda ini.
Dalem toko biasanja, boekan sadja toean Ong Sien Tjay, tapi djoega njonja Beton, jalah istrinja toean Ong, jang moeloetnja bawel, toeroet oeroes toko dan prentahnja moesti ditoeroet betoel. Malah boekan djarang ada satoe atawa laen atoeran toko jang bikin achirnja si penggawe jang kena pegang boentoetnja jang tida enak, jaitoe kaloe toean Ong Sien Tay djoestroe soeroe begini, njonja Beton soeroe begitoe.
Cepama njonja Beton jang soeroe iapoenja penggawe 'Tionghoa bawa rantang makanan boeat beli tjap-tjay atawa laen matjem makanan dalem restaurant Tionghoa, tapi toean Ong Sien Tjay sebaliknja djadi marah dan kataken itoe penggawe Tionghoa kenapa boekan soeroe djongos sadja pergi beli makanan.
Maka itoe orang sering godain Hiap Gie, katanja ia tahan bekerdja begitoe lama dan soeda doea kali disoeroe bawa rantang beli poe-jong-hay dalem restaurant Tjin Kie lantaran ada apa-apa jang diharep. „Wah, Hap Gie toenggoein dipoengoetin batoe!” kata kawan-kawannja sambil mesem menggoda.
Dan mendadak parasnja kita poenja pamoeda ini djadi merah jang bikin kawan-kawannja semingkin brani godain padanja. Kerna perobahan aer moeka ini ada sebagi satoe tanda jang oendjoek resia hatinja jang betoel-betoel.
Hiap Gie memang ada tjintain diam-diam pada nona Pat Nio dengen satoeloesnja hati, boekan lantaran memandang oewangnja. Diam-diam memang ia sänget harep bisa lamar itoe gadis apabila ia soeda bisa koempoel sedikit oewang boeat berdagang sendiri kendati setjara ketjil. Dalem hai ini ia memang harepken bantoeannja iapoenja chef, tapi ia tida harep boeat dipoengoet mantoe.
Akoe moesti beladjar berdiri. sendiri dan oendjoek kagagahan- ’koe dan kapandean’koe mentjari sasoeap nasi, baroelah akoe poenja harepan bisa terkaboel,” kata Hiap Gie saorang diri sembari kertekin giginja, „boeat harepin dipoengoet mantoe ada sebagi orang harepin emboen tengahari”.
Apabila ia pikir begini, Hiap Gie achirnja djadi sedi sendirinja. dan ingin brenti boeat tjari kerdjahan laen jang gadjinja lebih besar. Tapi niatan ini saban-sa-ban ia oeroengin. Ia pikir, djoestroe kaloe toean Ong Sien Tjay menaro kapertjajahan padanja ia bisa woedjoetken niatannja, tapi sebaliknja boeat koempoel oewang boeat modal dagang, ampir tida ada, harepan. Iapoenja gadji ada terlaloe ketjil aken bisa sampeken maksoed terseboet.
Dalem itoe lima taon poenja tempo ia hanja mempoenjai dalem postspaarbank koerang lebih doea ratoes roepia sadja. Zonder terasa aer matanja Hiap Gie mengetes; ia mepgela napas. Parasnja nona Pat Nio kombali berbajang di oedjoeng matanja. Pat Nio ada anak prampoean jang soeloeng dari toean Ong
