Kapan Tiongkok bisa beres?
SinPo.id - Koran sin Po edisi 25 November 1933 menulis laporan “Kapan Tiongkok bisa beres” dengan tanda tanya. Tulisan itu sebagai kritik terhadap pemerintah Ching dan sebagai propaganda terhadap publik di China atas kondisi pemerintahan yang dinilai tak beres.
SATOE revolutie dalem satoe negri pisa terbit dengen andjoerannja bebrapa pemimpin revolutionnair, tapi melaenken bisa berbasil djikaloe dapet tjoekoep toendjangan dari rahajat jang terbanjak. Rahajat bisa kena diasoet boeat bikin pengorbanan oentoek revolutie moesti mempoenjai sebab marika tida poeas sama keadahan jang marika hadepin, dan inginken perobahan jang lebih baek.
Djadi revolutie melaenken bisa moentjoel kaloe keadahan dalem negri soeda djadi begitoe roepa hingga rahajat djadi nekat boeat hadepin bahaja dengen pengharepan nanti dateng keadaham jang lebih baek. Maka dalem soeatoe revolutie moesti ada tergenggem kainginan-kainginan dari rahajat. Itoe kainginan-kainginan bisa djadi memang soeda ada di antara rahajat atawa soeda ditimboelken antara rahajat oleh pemimpin - pemimpin revolutionnair, tapi achirnja aken djadi satoe roepa bahoea, rahajat harep itoe kainginan-kainginan terkaboel.
Waktoe revolutie terbit di Tiongkok di taon 1911 doenia loear kaget meliat itoe revolutie soeda mendjalar begitoe tjepet hingga dalem sedikit tempo Ching dynasty lantas terdjoengkel. Tapi orang jang perna selidikin politiek di Tiongkok nistjaja mengarti bahoea bahaja revolutie memang soeda lama mangerem dan tjoema toenggoe tempo boeat maledaknja sadja. Rahajat Tiongkok poenja tida poeas sama keadahan di itoe masa soeda djadi keras sekali maka revolutie soeda dapetken sympathie di seloeroe negri.
Soeda tentoe i’oe revolutie poenja maksoed jang teroetama boekan boeat roeboehken Ching dynasty sadja. Tentang roeboehken Ching dynasty dianggep melaenken satoe permoelahan dari perobahan pada oeroesan pamerentahan dan sociaal oentoek membikin Tiongkok djadi satoe negri jang makmoer dan koeat.
Rahajat soeda djadi bentji pada Ching dynasty boekan teroetama lantaran itoe ada dynasty asing, kerna orang Boan soeda ambil over kasopanan dan traditie Tionghoa hingga bangsa Boan sendiri soeda seperti dileboer dan djadi orang Tionghoa.
Rahajat soeda djadi bentji pada Ching dynasty teroetama lantaran pamerentah-pamerentah Ching, jang blakangan soeda djadi boeroek, soeda tida bisa ikoetin perobahan djeman，soeda tida bisa oendjoek kakoeatan terhadep fihak loear, soeda bikin merosot Tiongkok dan bangsa Tionghoa poenja deradjat dalem pergaoelan doenia. Rahajat Tiongkok ingin perbaekin itoe karoesakan - karoesakan jang telah diperboeat oleh pamerentah Ching, itoe sebab soeda petja revolutie.
