Cultuur Tionghoa dalem sekola .…Barat
SinPo.id - Koran Sin Po edisi 7 Oktober 1933 lalu menulis laporan dunia pendidikan dan budaya dengan judul “Cultuur Tionghoa dalem sekola .…Barat”. Dalam laporannya koran Sin Po membandingkan budaya Tionghoa yang menempuh pendidikan di Barat.
Di Indonesia orang masi gembar-gembor tentang cultuur Tionghoa dalem sekola H. C. S. dan Holl. Chin. Kweekschool, tapi di Amerika Sariket orang soeda lama lakoeken, apa jang di sini masi diomongin.
Teachers College dari Columbia University telah terbitken satoe boekoe tentang ini jang sanget menarik hati, jalah „Western Youth meets Eastern Culture” („Moerid Barat katemoeken kasopanan Timoer.")
Ini boekoe ada penting, sebab boekan moeat theorie, tapi verslag lengkep tentang apa jang soeda dilakoeken dengen berhasil oleh tiga goeroe dari Junior High School dari Lincoln School, jalah satoe sekola dari Teachers College dari Columbia University.. New York.
Itoe tiga goeroe ada F. G. Sweeney (goeroe „Social Studies"), E. F. Barry (goeroe bahasa Inggris) dan A. E. Schoelkopf (goeroe boeat ”Art”)dan semoea tida mengarti bahasa Tionghoa atawa laen bahasa Timoer, hingga semoea apa jang ia adjarken marika dapet dari boekoe - boekoe bahasa asing atawa salinan-salinan dari bahasa Tionghoa atawa laen bahasa Timoer.
Mengarti jang negri-negri Timoer sebagi Tiongkok dan Japan pegang rol semingkin besar di doenia, Lincoln School anggep perloe jang moerid-moeridnja poen dikasi peladjaran tentang cultuur Tionghoa dan laen-laen bangsa Timoer.
Moerid-moerid dari Lincoln Junior High School oemoernja kirakira 12 poekoel rata, jalah anak-anak masi moeda, tapi peladjaran cultuur Timoer pada marika kaliatan berhasil setjara loear semoea doegahan.
Marika boekan tjoema djadi giat batja boekoe - boekoe tentang Tiongkok, Japan dan. Bangsa Hindoe, tapi iaorang poen kaliatan dapet inspiratie boeat karang sairan, bikin opstel, teeken gambar dan laen-laen jang mempoenjai hoeboengan. dengen cultuur Timoer!
Djoega marika perna maenken satoe tjerita tooneel Tionghoa dalem pakean Tionghoa aseli, dengen decor Tionghoa dan malahan dengen tetaboehan Tionghoa toelen !
