Tentang intellectualisme

Laporan: Sinpo
Rabu, 21 September 2022 | 08:31 WIB
Koran Sin Po 21 September 2022 (SinPo.id/Monash University)
Koran Sin Po 21 September 2022 (SinPo.id/Monash University)

SinPo.id -  Makna intelektual dikupas koran Sin Po edisi 21 September 1929. Tulisan itu menunjukkan perkembangan politik dan gerakan nasionalisme seiring semakin berkembangnya kelompok tepelajar.

Dalem waktoe blakangan ini di Indonesia perkatahan intellectueel” sanget sering dipake hingga ampir djadi oemoem. Tapi sasoenggoenja tida gampang tetapken mana jang intellectueel dan mana jang tida. Apatah intellectueel tjoema ada orang jang dapet peladjaran di Universiteit? Brapa banjak orang haroes poenjaken pengatahoean dan tjara berpikir jang bagimana haroes dipoenjaken soepaja orang bisa atawa „boleh” diseboet intellectueel? Djawabannja tida gampang, tapi tjoba kita selidikin!

Tapi biar bagimana poen, menoeroet kita poenja pikiran ada tjoepet djika pendidikan dari Hoogeschool atawa Universiteit dipake sebagi satoe-satoenja oekoeran boeat pengartian intellectueel. Riwajat oendjoek banjak tjonto tentang orang-orang asal ”rendah” atawa melarat, jang malahan belon perna bertjokol di bangkoe sekola pertengahan, dan toch lantaran berladjar sendiri setjara keras ada lebih dari tjoekoep harga boeat diseboet intellectueel.

Dan sebaliknja di antara orang-orang jang dapet titel-titel dari academie boekan sedikit djoemblahnja jang tida laen hanja samatjem encyclopaedie atawa eigenaar gelaran. Antaranja ada dapet tjoekoep pengatahoean jang saolah-olah didjedjal di otaknja ampir tjopot, tapi tida ada kamampoean atawa kakoeatan boeat bisa berpikir setjara origineel atawa merdika. Maka soeda tjoekoep njata, pendidikan universitair tida bisa diboeat oekoeran boeat kasi seboetan intellectueel.

Poenjaken ”djoemblah” pengatahoean jang didapet dengen selaloe train pikiran serta method dari kasi bekerdja pada otak atawa tjara berpikir, menoeroet kita poenja anggepan ada itoe qualificatie jang paling soeroep jang lebih banjak berharga dari satoe diploma atawa graad.

Orang bisa dapetken itoe pengatahoean dengen bertjokol di bangkoe sekola atawa dengen berladjar sendiri jang keras. Tetapi tentang tjara berpikir baek dibilang bahoea satoe intellectueel dari kaoem kaja ada poenja laen tjara berpikir dari oepama satoe intellectueel dari golongan boeroeh atawa melarat.sinpo

Komentar:
BERITALAINNYA
Koran Sin Po, 24 Maret 1928, (Monash University/SinPo.id)
Organisatie Tionghoa.
Minggu, 24 Maret 2024
Koran Sin Po 20 Maret 1926 (Monash University/SinPo.id)
“Bandjir besar di Brebes,”
Rabu, 20 Maret 2024
Koran Sin Po, 3 Maret 1928 (Monash University/SinPo.id)
Sifat nationaal dari sekola.
Minggu, 03 Maret 2024
Koran Sin Po, 19 Februrai 1927 (Monash University/SinPo.id)
Psychology dari Inggris.
Senin, 19 Februari 2024
Koran Sin Po, 6 Februari 1932 (monash University/SinPo.id
Poehoen-poelweai asing di Amerika.
Selasa, 06 Februari 2024