Penjakit Baji

SinPo.id -  Djaga baek-baek, soepaja dalem tete si iboe tida dapet zogstuwing. Ini bisa kadjadian kaloe aer tete poenja kaloear tida sampoerna, jang mana bikin aer tete di dalem djadi kering.

Mendjaga soepaja aer tete tida djadi stuwing: Kaloe si baji koerang koeat mengisepnja tete, si iboe bisa dapet stuwing. Djadi djika kiranja aer tete tida kaloear sebagimana moestinja, soepaja tida dapet stuwing, baek diperes atawa dipompa. Sedeng aer tete dari peresan atawa pompa itoe, diboeang atawa diminoemken si baji, ada tergantoeng sama kaperloeannja.

Voedingsziekte bisa djoega menjerang baji, manakala sang iboe poenja aer tete kakoerangan dzatdzat jang bergoena seperti vitaminen, besi d.1.1. Dari itoe, kaloe sasoeatoe iboe jang menetein anak, moesti ada poenja makanan jang banjak mengandoeng vitaminen dan laen dizat, oepamanja: katjang idjo, pisang, djeroek, pepaja, bajem dan groenten sebaginja (sajoer-sajoeran). Ini perloe dilakoeken, kerna waktoe itoe badan iboe poenja kaperloean ada djadi tambah, jaitoe, iapoenja baji poenja makanan.

Bagimana tjaranja menjapi (speenen) anak, soeda kita terangken di atas.

Apatah sebabnja baji moesti disapi? Sebab baji jang masi meneete itoe poenja kaperloean idoep ada tergantoeng dari si iboe poenja makanan. Kaloe satoe baji soeda bisa tahan mengantjoeken kaperloean idoep jang agak keras, boeat apa ia moesti selaloe njerot si iboe poenja makanan? Laen dari itoe, kaloe baji selaloe ditetein sadja, soeda tentoe meroesaken ka-doea-doeanja. Si iboe bisa dapet roesak, kerna ia belom tentoe dapet kaperloean badan poenja idoep dengen tjoekoep tetapi moesti membagiken kapada si baji. Si baji bisa roesak, kerna iapoenja idoep ada tergantoeng dari si iboe.