Basmi Linta Darat
Koran Sin Po 24 Agustus 1929 menerbitkan ancaman rentenir atau lintah darat. Sistem rente hutang yang menjerat ekonomi itu sudah menjadi keresahan di era kolonial. Jauh sebelum masyarakat terjerat pinjaman online atau Pinjol di era revolusi industri digital seperti sekarang.
SinPo.id - Di waktoe jang blakangan ini, bangsa Europa di sini banjak sekali jang bergiat boeat basmi segala linta-linta darat jang membawa boekan sedikit bintjana di roemah-roemah tangga jang tadinja idoep dengen tida koerang satoe apa.
Itoe Anti Woeker Vereeniging adalah itoe Perkoempoelan dari bangsa koelit poeti jang diberdiriken speciaal boeat mendjaga hingga anggota-anggotanja tida kadjiret oleh segala linta darat dan djika seandenja soeda kena terdjebak djoega, boeat membri pertoeloengan dan bantoean padanja dengen sabisa-bisanja hingga pelahan dengen pelahan bisa terlepas poela dari itoe djiretan.
Memang biar bagimana pelit djoega orang idoep, biar bagimana bisa djoega orang atoer pendapetan gadji dan pemakean ongkos saban hari, toch satoe waktoe, di koetika jang tida terdoega, hal-hal bisa dateng menggoda pada kita jang meminta ongkos serta pengaloearan oewang jang loear biasa.
Satoe waktoe kita bisa mendjadi sakit dengen mendadak, perloe panggil dokter, perloe sama obat-obatan dan pengrawatan jang loear biasa, seringkali kita brangkali perloe masoek ka hospitaal, dan ...........dari mana moesti tjari itoe oewang boeat toetoep itoe ongkos-ongkos jang loear biasa?
Satoe waktoe kita poenja orang toea meninggal, perloe sama ongkos koeboer, ongkos beli peti mati dan laen-laen ongkos jang menelen beratoes-ratoes roepia atawa...........satoe waktoe kita poenja njonja bakal dapet anak, ini djoega perloe pake ongkos jang besar.
