Anggepan Christen setjara loeas
SinPo.id - Antara bangsa Tionghoa (baek di Tiongkok, maoepoen di ini Hindia) banjak jang mendjadi Christen dan djoemblanja orang Tionghoa Christen semingkin besar. Padri-padri bangsa asing banjak sekali jang pergi ka Tiongkok boeat siarken igama Christen disana, dan antara itoe padri ada jang djoedjoer dan tida sajang boeang tempo dan tenaga boeat kapentingannja bangsa laen. Tapi sajang sekali ada jang anggep dirinja sebagi ”soldadoe-soldadoe” dari igama Christen, jang moesti „perangin" laen-laen igama. Dalem ”Asia” (Juni, 1924) Daniel Johnson I'leming telah njataken ia poenja pikiran tentang ini soewal dalem ia poenja toelisan „Open-minded Christianity".
Ini penoelis sendiri ada satoe, padri Christen, tapi ia roepa-roepanja mempoenjai pikiran terboeka dan mempoenjai pemandangan loeas hingga njataken teroes terang ia tiada bisa setoedjoe kaoem Christen goenaken oetjapan-oetjapan militair sebagi „kamenangan boeat kaoem Christen?’?„menjerang atas namanja Christus’’?dan sebaginja. Djoega ia merasa tida setoedjoe boea1 namaken orang-orang jang berigama laen ”kafir” ; itoe oetjapan tjoema oendjoek tjoepetnja orang jang kaloearken itoe perkatahan. Ini teroetama baek diperhatiken oleh pendekar-pendekar Christen jang hendak siarken iaorang poenja igama di negrinegri jang berigama laen, sebagi Tiongkok, Hindia-lnggris, Java dan laen-laen lagi. Igama Christen mempoenjai banjak sifat jang bagoes, sebagi djoega laenlaen igama atawa philosophic ; dan itoe kabagoesan teroetama dioendjoek dengen perboeatan-perboeatan bagoes dan boekan dengen oetjapan oetjapan meloeloe jang seperti tertaboer dengen oedjaroedjar kitab soetji. Padri-padri Christen jang boeka roemah sekola atawa roemah sakit di doesoen-doesoen Tiongkok boeat toe loeng sesama manoesia sadjoedjoernja ada lebih bisa menarik dari orang Christen jang tjoema bisa bitjaraken kabagoesannja iaorang poenja igama dengen moeloet sadja.
