Wet dan kabedjikan

SinPo.id - Wet dan kabedjikan ada doea hal jang sering dibikin _saroe; toch' ada satoe perbedaan jang sampe njata antara wet dan kabedjikan, antara legaliteit dan moraliteit. Orang jang belon perna „langgar wet negri”?jang belon perna mengadep pada hakim belon tentoe ada saorang jang berderadjat tinggi; orang djahat atawa penipoe jang pinter bisa lakoeken ia poenja kerdjaiin jang tida senoenoeh zonder melanggar wet. Tapi orang tida bisa berboeat tida senoenoeh zonder melanggar kabedjikan (moraliteit). Kabedjikan ada lebih tinggi dari wet, kabedjikan ada mempoenjai oekoeran jang lebih dalem ; kabedjikan ada mempoenjai lebih banjak intrinsic v a -1 u e.

Oemoemnja publiek pandang wet negri sebagi oekoeran moraliteit dan bilang :„Orang baek tentoe tida laoe masoek boei, tjoema orang djahatnja sadja langgar wet’’. Atawa ”Goea ma orang baek-baek, sebab belon taoe ditangkep politie”. Oemoemnja ini memang betoel, tapi orang djanganlah kira wet negri bisa dipandang, sebagi wet dari moraal. Orang jang merppoenjai kabedjikan tentoe sadja tida aken langgar wet kabedjikan, tapi orang jang mempoenjai kabedjikan atjapkali kapaksa moesti langgar wet negri Sebaliknja orang jang tjoema tida langgar wet negri sadja, masi djaoe bisa dibilang mempoenjai kabedjikan. Seperti kita soeda bilang kabedjikan ada lebih tinggi dari wet dan baeklah kita kasi satoe tjonto.

Debendranath Tagore ada ajahnja Rabindranath Tagore, jalah itoe penjair Hindoe jang termashoer. Koetika Debendranath Tagore poenja ajah meninggal (djadinja englcongnja Rabindranath Tagore), ia mempoenjai banjak sekali oetang. Menoeroet wet negri ia poenja anak troesa bajar itoe oetang, hingga kaloe Debendranath Tagore tida bajar itoe oetang, ia tiada melanggar wet negri sama sekali. Tapi maskipoen begitoe ia djoeal ia poenja tanah jang besar dan bajar oetangnja ia poenja ajah, sebab ia lebih soeka mendjadi soesa dan miskin sendiri dari pada bikin laen orang soesa lantaran oewangnja tida dibajar. Debendranath Tagore oendjoek ia ada mempoenjai kabedjikan, mempoenjai oekoeran jang djaoe lebih tinggi dan moelia dari wet negri belaka. Betoel dalem banjak hal wet negri dan wet kabedjikan tjotjok satoe pada laen; oepama wet negri larang memboenoesesama manoesia, wet kabedjikan djoega anggep berdosa kaloe boenoe sesama manoesia.

Tapi banjak sekali katjoewalinja. Orang kadang-kadang perloe melanggar „wet negri” boeat berlakoe...adil. Begitoelah sala satoe achli wet bangsa Duitsch jang terkenal, jalah Leyser (1683 — 1752) telah senga dja „langgar wet”. Satoe soedagar telah teeken contract boeat lever barang dengan harga jang ditetapken, tapi lantaran keadaan beroba di loear ia poenja sala, ia tida bisa pegang djandji ia dihadepken pada hakim (Leyser).Leyser bisa paksa pada soedagar jang tida bisa djalanken contract, tapi kaloe ia berboeat begitoe ia taoe itoe soedagarbakal tjilaka besar dan failliet. Dari itoe Leyser poetoesken, itoe harga jang ditetapken dalem contract moesti dirobah, soepaja itoe? soedagar tida mendapet tjilaka.

Leyser sebenarnja langgar wet negri, sebab wet larang orang robah contract; tapi menoeroet kabedjikan Leyser tida berlakoe sala, sebab dengan begitoe ia toeloeng satoe orang jang tjilaka. Prof. Mr. I. H. Hymans bilang ini anggepan mempoenjai „een hoog modern karakter" (Geschiedenis der Rechtswetenschap, p. 168). Laen tjonto lagi jang wet negri tida bisa diboeat oekoeran dari saorang poenja kabedjikan orang menampak dalem oeroesan politiek. Koetika Dr. Sun Yat Sen melawan pamerentaan Boan jang boeroek, ia tentoe sadja melanggar „wet negri”?jalah wet jang dibikin oleh pamerentaan Boan sendiri. Tapi menoeroet kabedjikan ia tida berlakoe djahat, lantaran hendak lepasken bangsanja dari pamerentaan jang boeroek dan memeras. Dan ini boekan di Tiongkok sadja; di antero doenia saorang jang hendak lepasken bangsanja dari pamerentaan asing poenja tindihan dianggep sebagi „pendjahat” sebab langgar wet negri (jang nota bene diadaken dan dibikin oleh itoe pamerentaan asing sendiri), tapi menoeroet kabedjikan orang begitoe boekan pendjahat sama sekali tapi satoe orang jang berdjsa dan tida sajang korbanken diri boeat bangsanja.

Paperangan jang paling bersifat moelia ada paperangan boeat lepasken bangsa sendiri dari tjengkeramannja laen bangsa, tapi.................... di antero doenia djoestroe ini matjem paperangan dianggep ”djahat” sebab langgar wet negri dan dinamaken ”pembrontakan.” Djoestroe paperangan jang paling beharga boeat dinamaken moelia dianggep paling djahat oleh wet negri atawa sebagi John Dewey ada bilang dalem ia poenja „The Outlawing of War” ? ”According to our own commonsense and judgment the only kind of war that is morally justified, is the only kind of war that is legally wrong”. Troesa dibitjaraken lagi jang dalem ini hal wet negri poenja oekoeran jangmengok dan miring. Pameientahan—•jang begimana boeroek poen selaloe pandang dirinja benar dan selaloe b i k i n wet-wet boeat enaknja sendiri. Pamerentahan selaloe ada legaal, tapi sama sekali tida selaloe moreel. Orang djangan loepa boekan wet-wet jang lahirken pamerentahan, tapi sebaliknja pamerentahan jang lahirken wet, sebab orang moesti inget jang pamerentah „niemals erst durch einen Akt der Rechtsordnung entstehen, sondern immer erst, nachdem er entstanden, in eine Rechtsordnung umwarideln kann’’ (W. Wundt, Elemente der Volkerpsychologie,S. 348).

Wet negri dan kabedjikan dari itoe sering moesti dipisaken djaoe-djaoe sebab wet-wet negri banjak sekali jang berat sabelah dan pintjang, tapi kabedjikan jang sedjati tida bisa berat sabelah- Sebab kaloe ia berat sabelah, ia ilang itoe nama ”kabedjikan” dengen automatisch. Ebbinghaus djoega bikin perbedahan jang njata dalem ”Die Kultur der Gegenwart” (Teil I, Abt. Vi, S. 199) antara wet negri (”Recht”)dan wet kabedjikan (”Sittlichkeit”). Apa jang moesti didjoendjoeng palingtinggi boekan ada wet negri, tapi kabedjikan, boekan legaliteit tapi moraliteit.