Negri - negri Pacific dalem boekoe sekola.

SinPo.id -

Negri - negri Pacific dalem boekoe sekola.

Di djeman doeloe negri-negri jang terletak di sapoeternja Laoetan Tengah (Mediterranear) ada negri-negri jang berpengaroe dan makmoer.

Orang tjoema perloe seboet sadja, nama-namanja negri-negri Assyrie Egypte, Carthago, Griekenland dan Rome boeat boektiken ini hal.

Di negri Barat laoetan terseboet di djeman doeloe ada poesatnja kasopanan, tetapi blakangan itoe poesat pinda ka sabelah Barat.

Lantaran ini negri-negri jang terletak di tepi laoetan Atlantic jang paling penting dan madjoe; djoega bagian Timoer dari binoewa Amerika ada terletak di pinggirnja ini laoetan jang paling rame.

Boeat di waktoe sekarang tiada bisa disangkal Europa dan Amerika jang paling berpengaroe dalem ini doenia, tetapi itoe poesat kapentingan jang tadinja terletak di Laoetan Tengah dan sekarang soeda terdesar ka sabelah Barat sampe di Laoetan Atlantic roepa-roepanja bakal samingkin terdesar ka sabelah Barat.

Di hari kamoedian poesat kapentingan boleh djadi aken pindah ka Laoetan Pacific atawa Laoetan Tedoe.

Negri-negri jang terletak dekat atawa sapoeternja ini laoetan besar ada Tiongkok. Japan, Hindia, Australie dan bagian Barat dari Amerika.

Banjak orang bilang jang ini negri-negri aken pegang tol jang penting sekali dalem doenia di hari kamoedian.

Kaloe ini doegahan ada benar, orang djadi boleh bilang poesat kapentingan terdesar ka djoeroesan Barat jalah dari Laoetan Tengah meliwatin Laoetan Atlantic sampe ka Laoetan Tedoe.

Peladjaran dalem roemah sekola tentoe sadja moesti menoeroet alirannja djeman ; dari itoe boekoe-boekoe sekola Saban-saban moesti ditoekar agar tiada kablakangan.

Sekarang oemoemnja dalem boekoe- boekoe peladjaran sekola tiada begitoe banjak dibitjaraken tentang keadahan negri-negri Pacifie.

Dalem boekoe sekola orang bitjaraken . Europa dan Amerika dengen lengkap, tetapi Tiongkok, Japan dan laen-laen negri Pacific tjoema dibitjaraken „asal sadja’’?.

Paul W. Terry (Assistent Professor of Education dalem University of Washington) dan Miss Judith Greguson (dari Oneen Anne High School?Seattle, Washington) bitjaraken ini hal dalem iaorang poenja toelisan tentang ”Blind spots in the high school curriculum” (Educational Review", June, 1923) dan iaorang oendjoek dengen angka-angka bagimana sedikitnja orang perhatiken negri-negri Pacific dalem boekoe-boekoe sekola di Amerika.

Iaorang telah preksa toedjoe boekoe sekolah dan perloeken itoeng bebrapa banjak garis telah digoenaken boeat bitjaraken negri-negri Pacific.

Kasoedahannja ini pamereksahan ada seperti berikoet:

Negri-negri jang tjarken :                              Djombla garisan :                             Djomblea % dari isinja boekoe :

Tiongkok                                                                              944                                                         0,57

Japan                                                                                    939                                                         0,57

Canada                                                                                 725                                                         0,45

Australie                                                                              304                                                         0,18

Sama sekali                                                                         2912                                                       1,77%

Dari angka-angka di atas orang tiada bisa bilang orang „banjak" perhatiken negri-negri Pacific.

Tapi ini hal orang boekan tjoema menampak dalem boekoe-boekoe sekolah di Amerika Sariket sadja.

Djoega dalem boekoe-boekoe peladjaran Olanda jang digoenaken di ini Hindia ampir tiada perhatiken kaadahan negri-negri Pacific jang berdamping.

Ambil sadja boekoe hikajat sabagi tjonto; teroetama dibitjaraken hikajat Europa hingga segala tek-tek bengek sampe moesti di peladjarken djoega: tentang hikajat Tiongkok atawa Japan orang tjoema dapet doea tiga garis.

Dan kaloe Tiongkok dibitjaraken ampir salaloe. . . . . berhoeboeng dengen itoe Boxer opstand.

Begitoepoen dalem boekoe ilmoe boemi (geographie); kaadahan soengei Donan dibitjaraken pandjang lebar seperti djoega solokan-solokan di Nederland, tetapi tentang kaadahan Tiongkok, Japan atawa Australie (jalah tetangga-tetangga jang deket dari Hindia!) tjoema dibitjaraken dengen sakelebatan sadja.

Ini hal teroetama menjolok dalem Holl. Chineesche Scholen dimana samoea moeridnja ada moerid-moerid Tionghoa.

Ini moerid-moerid samoea kenal Piet Hein, Kenau Simon Haselaar dan laen- laen ,,orang gaga’’ dari doea tiga abad jang laloe di negri Olanda, tetapi tentang Oey Tee, Lie Sie Bin atawa Lee Goan Hong banjak jang . . . . .belon taoe denger !’’

Dan jang taoe denger, ada jang kira Lee Goan Hong ada ajahnja. . . .Oey Tee !