Orang Tionghoa dan oeroesan assurantie.
SinPo.id -PEMBATJA tentoe tida banjak jang taoe bahoea djoega dalem cercesan assurantie orang Tionghoa pegang rol jang penting di sini. Meruoeroet agent dari Nillmij di Semarang orang Tionghoa kasi pertanggoengin djiwanja dalem boentoet taon 1904 boeat djoemblah anem millioen roepia.
Tapi pada ultimo taon 1928 ini angka lontjat djadi f 53.000.000! Atawa ampir sembilan kali lipet dalem tempo belon 25 taon!
Menoeroet taksiran dari Nanyang Insurance Agency oewang premie roepa-roepa assurantie jang orang Tionghoa di saloeroe Indonesia bajar saban taon ada kira-kira 6 millioen roepia atawa saban boelan tida koerang dari satengah millioen roepia!
Disini orang bisa masoek assurantie pada doea matjem peroesahan assurantie, jalah pertama pada kongsi-kongsi assurantie jang pegang risico sendiri sebagi China United, Sun Life, Nillmij, Arnhem, dan sebaginja dan kadoea orang bisa kasi masoek assurantie pada satoe assurantie-agentschap sebagi oepama pada Blom & Van der Aa jang sendiri boekan kongsi assurantie, tapi djadi semacem agent dari bebrapa kongsi assurantie.
Di kalangan bangsa Tionghoa di sini doeloe tjoema ada kongsi-kongsi assurantie model pertama, jalah kongsi-kongsi jang pegang risico sendiri, tapi peroesahan Tionghoa sebagi Blom & Van der Aa baroe moentjoel, jalah N. V. Nanyang Insurance Agency di Batavia.
Ini kongsi boeken kongsi assurantie, tapi ada agentschap dari bebrapa kongsi assurantie besar, hingga risico poen dipikoel oleh itoe kongsi-kongsi assurantie, boekan oleh Nanyang Insurance Agency jang tjoema djadi sematjem djembatan sadja.
Nanyang Insurance Agency bekerdja dengen kapitaal dari f 50.000.— dan mempoenjai aandeelhouders antara banjak orang-orang Tionghoa terkenal.
Voorloopig' bestuur terdiri oleh toean Siauw Pek Tjoei (jang perna pahamiken ilmoe assurantie di Amerika Sariket) sebagi directeur dan Dr. Ang Eng Tjoei, toean Nio Peng Long (voorz. Siang- Hwee Batavia), toean Khouw Ke Hien (Dir.„Merbaboe") dan toean. Loa Sek Hie sebagi commissarissen.
Nanyang Insurance Agency wakiliken bebrapa kongsi terkenal sebagi kongsi Nillmy (jang mempoenjai technische reserves dari 48,7 millioen roepia) dan kongsi „De Nederlanden”, satoe concern dengen kapitaal distort dari f 6.500.000 dan technische reserve dari 78 millioen roepia.
Pada Nanyang orang bisa masoek assurantie apa sadja, djiwa, api, auto, laoet enz. dan jang tanggoeng semoea risico seperti dibilang ada kongsi-kongsi jang kasi dirinja diwakilken oleh Nanyang.
Orang Tionghoa semingkin lama semingkin mengarti kapentingannja masoek assurantie dan djoemblahnja premie jang marika bajar pasti poen toeroet naek setjara berimbangan.
Hingga kita rasa djoega boeat kongsi-kongsi assurantie Tionghoa jang tegoe dan boleh diandelin dan boeat assurantie-agentschappen Tionghoa di sini masi terletak lapangan jang loeas sekali, sebab maski betoel orang Tionghoa semingkin banjak jang masoek roepa-roepa assurantie, kaloe dibandingken dengen golongan Europa, golongan Tionghoa masi terblakang djaoe sekali !
Begitoelah di boentoet taon 1928 golongan Europa pertanggoengin djiwanja boeat djoemblah ƒ 280.000.000 dan golongan Tionghoa baroe boeat ƒ 53.000.000. Toch relatief golongan Tionghoa madjoe lebih tjepet, sebab dari taon 1904 sampe taon 1928 djomblah assurantie d jiwa dari golongan Tionghoa naek dari 6 sampe 53 millioen (ampir 9 kali lipet!) dan, dari golongan Europa dari 65 sampe 280 millioen (atawa kirakira 4 1/2 kali lipet). Tjoema publiek Tionghoa koedoe dikasi panerangan doeloe keadahan doenia assurantie, sebab masi banjak jang koerang mengarti.
