Roepa-roepa dari kalangan pengataoean.
SinPo.id -Di hadepan vergadering dari U American Association for the Advancement of Science, Dr. E. W. Flosdorf dan Dr. L. A. Chambers telah kasi pertoendjoekan jang seperti soenglap. Ia bikin satoe telor mentah djadi „satengah mateng” meloeloe dengen soeara jang' keras (sharp sound) boeat bebrapa minuut lamanja. Doeloe dalem ini weekblad soeda perna diwartaken bagimana orang bisa boenoeh koetoe-koetoe dengen soeara keras speciaal dan sekarang soeara ternjata poen bisa bikin telor djadi satengah mateng. Doea achli terseboet poen soeda berhasil boeat robah ethyl acetate dalem acetic acid dan djoega boeat bikin acetylene dari minjak tetaneman meloeloe dengen goenaken foeara-soeara jang speciaal. Manoesia soenggoe moesti diakoeh semingkin pinter; ia soeda bisa goenaken tenaga aer, tenaga kilap dan sekarang ia moelai goenaken tenaga............. soeara! (Scientific American, September 1933).
Vitamin seperti orang taoe ada baek, tapi terlaloe banjak ternjata tida baek. Sebagi djoega kina ada obat mandjoer, tapi kaloe kita makan terlaloe banjak kina, ini obat berbalik bisa djadi ratjoen. Dalem Edinburgh Medical Journal Dr. L. Thatcher bikin rapport tentang satoe anak oemoer 18 boelan jang meninggal sebab sakit di boewah pinggang (nier). Apa ternjata ini anak dikasi makan ”Ergosterol” jang mengandoeng vitamie D, tapi orang kasi ia makan terlaloe banjak jang sampe doea kali lipet dari sebagimana moestinja ! Hingga itoe anak djadi mati sebab ……… vitamine D.
Menoeroet Power Plant Engineering orang sekarang bisa bikin kawat platinum jang 30 kali lebih aloes dari.......... ramboet manoesia. 13.300 kawat demikian tjoema makan terapat satoe inch! Satoe pond platinum bisa dirobah djadi 25.100.000 kaki dari kawat aloes demikian atawa 4.750 mijl lebih pandjang dari bola doenia poenja radius. Harganja ini kawat aloes dan pandjang ada $ 11.280.000!
Prof. Erik Haegglund telah madjoeken rapport pada Swedish Government Forestry Commission, dalem mana ia toetoerken bagimana 1.000.000 ton goela saban taon bisa dibikin dari 1.500.000 ton kajoe kering dengen goenaken concentrated, hydrochloric acid!
Journal of the American Medical Association wartaken pendapetan baroe dari satoe achli Rus, jalah Dr. Judine dari Hospital di Moscou, boeat goenaken darah orang mati waktoe lakoeken blood transfusion. Orang sakit kadang-kadang perloe dapet darah dari laen orang, tapi darah orang idoep tentoe sadja tida selaloe sedia. Ternjata darah orang jang baroe mati ,poen sama mandjoernja, jalah kaloe ia mati belon liwat 12 djam. Ini darah kaloe dikaloearken dari mait dan disimpen di tempat dingin bisa tahan samps 28 hari.
Di tentoonstelling doenia di Chicago ini taon antara laen-laen orang bisa liat satoe gedong loear biasa jang dibikin dari batoe-batoe bata dari.......... glas jang berlobang dalemnja. Ini lobang ada sematjem isolator, hingga gedong jang pake ini batoe dari glas bisa simpen hawa anget di waktoe moesim dingin dan hawa adem di moesim panas. Tjara pasangnja ampir sama sebagi batoe bata biasa dan koeatnja Poen tida berbeda. Dan kaloe gedong dari glas begini diterangken dalemnja gilang goemilangnja dari loear tida bisa diloekisken dengen perkatahan.
