Keadahan Di Peking

SinPo.id - Kedjadian di Peking dalem minggoe jang laloe, jang penting adalah lari nja president Lee Yuan Hung ka Tientsin, lantaran kwatir pada terbitnja pembrontakan di iboe kota.

Maskipoen kabar jang mewartaken hal ini tida ada menoetoerken sebab-sebabnja jang terang, tapi bisa didoega pasti jang ini tentoc ada berhoeboeng sama soeal kadoedoekannja president, kerna soeda lama Tsao Kun ada ilerken itoe kadoedoekan jang paling tinggi dan boeat itoe bebrapa millioen dollar ia soeda pake goena beli soearanja leden parlement. Tapi kaliatan njata jang dalem ini perkara president Lee tida maoe mengala, sabrapa bisa ia maoe tjoba halangken maksoednja Tsao Kun, hingga ini orang jang takoet kainginannja mendjadi gagal roepanja telah andjoerken soldadoe-soldadoe di Peking mengantjem aken bikin pembrontakan soepaja. president Lee djadi takoet dan meletakin djabatannja. Akal samatjem ini memang soeda biasa digoenaken oleh orang-orang militair cli Tiongkok, tapi saande orang jang digertak itoe tida mendjadi djeri dan teroes lawan dengen kakerasan, boekankah satoe kakaloetan jang heibat lantas terbit dan rahajat negri jang moesti tanggoeng semoea kasangsarahannja ?

Sekarang president Lee soeda melariken diri ka Tientsin dan siapa jang gantiken ia poenja kadoedoekan, belon ada kabarnja. Dalem doegahan bisa dipastiken tentoe tida ada laen orang dari Tsao Kun jang nanti doedoekin itoe tempat kosong, tjoema zonder ada alesan-alesan jang pantas tentoe djoega Tsao Kun tida brani doedoek dengen begitoe sadja, apa poela dalem perkara perampokan kreta api di Lin-cheng baroe ini Tsao Kun poenja nama ada terpandang koerang baek antara negri-negri asing. Boeat ini masa, tida perdoeli siapa sadja orang-orang di Oetara tjokol djacli president, kadoedoekannja semoea tida bisa terbilang sah, kerna dapetnja tida toeroet djalannja wet jang betoel.

Koetika Hsu Shi Chang digebos oleh kaoem Chihli, Lee Yuan Hung telah dioendang boeat pegang lagi ia poenja djabatan sebagi president, tapi sekarang, satelah njata jang Lee Yuan Hung tida ada ingetan aken tinggalken itoe djabatan jang ia soeda dapet, dengen paksa iaorang gebos kombali padanja, hingga maoe tida maoe moesti melariken diri. Dari sini terliat njata sekali Lee poenja kalemahan, saolah-olah orang pandang padanja melaenken satoe boneka jang boleh dipermaenken sasoekanja.

Aken tetapi, maski bagimana djoega ini lelakon sateroesnja aken dimaenken, lebih doeloe bisa didoega jang kasoedahannja tentoe membikin kaadahan negri jang memang soeda kaloet djadi samingkin tida kaoeroesan dan penoempahan dara djacli bertambah heibat, sebab golongan jang tida setoedjoe sama perboeatan itoe tentoe bikin perlawanan. Bagi Tsao Kun boleh djadi itoe lawanan tida terlaloe diboeat kwatir kerna ia anggep tenaga tentaranja ada sampe koeat boeat lawan itoe semoea, tapi kita rasa tenaga militair tida boleh diandelken terlaloe banjak, sebab maski kakoeatan tentaranja ada tegoeh, kaloe rahajat tida soeka sama itoe perboeatan poen tenaga itoe ampir tida ada goenanja sama sekali. Gerakan Yuan Shi Kai telah mendjadi satoe boekti. Kaloe maoe dibandingken kakoeatannja Yuan Shi Kai di itoe waktoe dengen Tsao Kun sekarang, jang terseboet blakangan boleh dibilang belon saparonja, tapi toch satoe kali Generaal Tsai Ao angkat kapala, Yuan poenja maksoed djacli gagal.

Sabetoelnja, maski tida dengen memaksa, toch itoe djabatan president tida aken djato pada laen orang dari Tsao Kun, maka ini perboeatan jang kaboeroe napsoe, sabaliknja dari mengasi hasil jang baek, nanti bisa mendjadi halangan besar bagi Tsao Kun poenja maksoed itoe. Apa poela itoe oeroesan penangkepan pada orang-orang asing oleh itoe perampok di Lin-cheng sekarang masih belon cl ioeroes beres, dan kaloe menginget jang oedara diplomatiek di Peking ada begitoe djelek, bisa dibilang cijoega jang Tsao Kun poenja tindakan ini ada mengantjem kaslame- tannja negri. Tiongkok poenja kadoedoekan sekarang ada berdamping dengen bahaja, sedeng pada party-party, salaen kerdja goena kapentingan sendiri tida bisa diharep aken perbaeki kaadahan negri.

Tiongkok perloe dapet toeloengan dari rahajatnja, tapi kapan tah rahajat Tionghoa bisa mendoesin ?