Smokkelaar-smokkelaar amateur di Duitschland
DALEM segala hai, larangari jang keras timboelin perlanggaran jang tjerdik. Di pelaboean jang merdika tida ada orang jang merasa perloe smokkel barang, tapi tarief bea jang sanget tinggi, larangan masoek atawa kaloear, jang bikin smokkelaar-smokkelaar djadi semingkin litjin, seperti djoega belasting jang sanget berat timboelin banjak akal boeat seloeloepin padjek.
Pamerentah Duitsch soeda kaloearin titah boeat larang orang bawa kaloear oewang dari Duitschland dengen maksoed soepaja harga oewang mark tida bisa merosot. Tapi banjak orang hartawan di itoe negri djadi koeatir kerna kekajahannja bisa djadi ambles seandenja Duitschland satoe masa terpaksa lakoeken poela inflatie. Kerna demikian marika djadi poeter otak boeat melolos dari itoe wet.
Michael Graham telah toetoerken bebrapa tjonto dari marika poenja tjara jang litjin bawa kaboer kekajahannja kaloear negri seperti brikoet: Dalem Völkischer Beobachter, satoe orgaan officieel dari pamerentah Nazi, berselang belon terlaloe lama telah moentjoel satoe advertentie jang boenjinja bahoea directeur dari satoe antara kongsi-kongsi wadja jang paling besar maoe tjari satoe privaat secretaris, dan bahoea soerat-soerat lamaran dengen katerangan lengkep haroes ditaroin nummer anoe dan dialamatken pada itoe soeat kabar.
Bebrapa djam sasoedanja itoe advertentie moentjoel, bel telefoon berboenji di kantoornja Vökischer Reobachter, satoe toean kasi kabar per itoe telefoon bahoea ia ada itoe crang jang moeat advertentie terseboet.
