Jang berdosa
DI masa ini tjerita terdjadi, di kota Betawie masi berdjalan systeem kapolisian jang koeno dan oeroesan pengadilan poen masi saderhana. Boeat oeroes dan djaga katentreman oemoem soeda dianggep tjoekoep dengen satoe resident dengen terbantoe oleh assistentresident dan satoe schout jang mengapalaken golongan politie.
Dan ini „kangdjeng toean Sakaoet” boekan sadja ditakoetin, tapi djoega pengaroehnja ada sanget besar sekali dan ini bisa dimengarti kerna segala perkara kapolisian boleh dibilang seanteronja djato dalem tangan kakoeasahannja.
Dan boekan ada omong kosong meloeloe, anak-anak jang dojan nangis atawa tida maoe lekas-lekas tidoer, kaloe diseboet sadja ada „toean sakaoet” lantas djadi diam dan katakoetan.! Dan ini toean. Sakaoet selaloe djalan ronda dengen oppas-oppasnja jang biasanja diseboet djoega „opas-patroli” jang pake-pakean item dengen plangi koening, pake toedoeng batok dan kaki telandjang. Maka itoe poen marika dapet itoe nama pojokan „boeroeng kenari”.
Seperti biasa pada soeatoe malem toean Sakaoet djalan ronda di-iringken oleh ampat oppasnja; djalan-djalanan ada gelap dan soenji, sedeng angin menioep kentjeng, soearanja menderoe laksana mengeloehnja riboean iblis hingga membikin boeloe badan djadi berdiri dan mengkirik, kerna itoe waktoe orang berada di boelan Tjit-Gwee.
Di djoeroesan djalan Pinangsia jang soenji kadengeran soeara orang bertreak „adoehhh” di-ikoetin oleh satoe gabroekan dari saroepa barang berat jang djato aken kamoedian tida kadengeran soeara apa-apa lagi, tapi dengen katjepetan seperti kilat, toean Sakaoet soeda lari memboeroe.
