Astana perdamian di Den Haag
Dalem tahon, di mana ex-president Wilson jang baroe wafat, diangkat mendjadi president dari Amerika Sariket, Astana Perdamian diboeka di kota Den Haag (Nederland). Gedong terseboet diboeka pada tang 28 Augustus 1913 dan seperti orang taoe Andrew Carnegie, (itoe millionair Amerikaan jang dermawan) telah toendjang dengen oewang pendirihannja ini Astana Perdamian. Dalem tahon 1903 Carnegie soeda serahken satoe stengah millioen dollar pada pamerentah Olanda boeat diriken satoe gedong boeat madjelis membikin dami.
Dalem taon 1894 brapa orang merasa itoe perlombahan dalem oeroesan lengkepin sendjata haroes diwatesken dan Czaar Alexander III dari Rusland njataken setoedjoe dengen itoe pikiran. Tapi ia meninggal dalem tahon 1894 djoega.
Antara orang-orang jang paling giat berkerdja boeat ini maksoed, teroetama moesti diseboet William T. Stead, (jang telah diriken „The Review of Reviews”). Seperti orang taoe dalem tahon 1899 diadaken Conferentie di Den Haag berhoeboeng dengen ini oeroesan dan ini Conferentie mendjadi sebab dari pendiriannja Astana Perdamian.
Carnegie jang merasa ketarik oleh Conferentie terseboet, lantas kasi oewang soembangan jang besar seperti dibilang di sebla atasan. Pamerentah Olanda tambaken itoe oewang dengen 700.000 roepia boeat beli lima hectare tanah aken diriken,,Astana Perdamian”.
Architect-architect jang diriken ini gedong ada M. Cordonniere dari Brussel (jang dapet prys nummer satoe boeat poenja plan) dan Van de Steur. Ini gedong tida menoeroet betoel plan dari Cordonniere, sebab ada bagian-bagian jang dirobah oleh Van de Steur.
Apa maoe ini „Astana Perdamian" didiriken atas tanah.... pasir dan orang jang soeka menjindir tentoe sadja antas tertawa dan bilang: „Liatlah itoe ada satoe symbool jang perdamian poenja dasar tida tegoe ; Astana Perdamian poenja fondament ada… pasir”. Tapi F. Herbert Stead telah kasi djawaban lebih doeloe dengen bilang:„Sand makes a good foundation if you only sink deep enough” atawa „Pasir bisa didjadiken fondament jang tegoe, asal sadja orang menggali sampe dalem”.
Dan betoel orang telah menggali sampe toedjoe meter, boeat diriken fondament dari ini Astana Perdamian. Dalem ini Astana ada ampat patoeng buste dari Hugo Grotius, dari radja Edward VII, dari Sir Randall Cremer (jang bersama Karl Marx dan Mazzini bantoe diriken „International”) dari dari W. T. Stead (oekiran dari Toon Du-puisi.) Ampir semoewa bangsa telah kasi persenan pada ini Astana Perdamian. Batoe graniet di bagian bawa tembok ada persenan dari pamerentah Noorwegen dan Zweden. Fontein aer mantjoer di tengah kebon ada persenan dari Denemarken.
Marmer ada, persenan dari pamerentah Italie. Tangga batoe marmer ada persenannja kota Den Haag. Argentinie persen patoeng-patoeng dan Nederland kasi persen tanah. Engeland telah kasi katja-katja dan Frankryk goedri dan pigoera. Keizer Rusland telah persen satoe vaas, Hongarye anem vaas, Oos tenryk anem tempat tantjep lilin. Amerika Sariket kasi sarombongan patoeng dari marmer dan brons.
