TIONGKOK, Manchurije menaloek.
SinPo.id - Koran Sin Po edisi 5 Januari 1929, dalam kopartemen Tingkok menulis judul tentang Manchurije menaloek. Tulisan itu menarasikan para pemimpin di Mancuria, yakni Chang Hsueh Liang membentuk pemerintahan nasional untuk perdamaian. Dalam penjelasanya, koran Sin Po menulis peran perdamaian partai di tiga provinsi negara Mancuria.
Sasoeda moendoer madjoe boeat bebrapa boelan poenja lama, achirnja di boentoet taon jang laloe pemimpin-pemimpin di Manchurije dengen dikapalaken oleh Chang Hsueh Liang njataken menaloek pada pamerentah National. Dengen didapetken perdamian sama itoe partij Fengtien, boleh dibilang pameretah poenja oeroesan terhadep soeal di Tiga Provincie Timoer telah dapet karinganan，kerna soeal jang paling soeker, dengen begitoe djadi soeda dipetjaken.
Tapi apa itoe penoekaran bendera di Manchurije, jaitoe bergantinja bendera lima warna dengen Tjeng Thian Pek Djit ada berarti jang Chang Hsueh Liang bakal lakoeken pamerentahan menoeroet angen-angen Kuomintang, biarpoen ia kata, bahoea menoeroet kainginannja jang paling achir dari Chang Tso Lin ia telah trima baek Dr. Sun Yat Sen poenja Sam Bin Tjoe Gie, toch itoe masih djadi pertanjahan.
Djika benar ia berboeat begitoe toeroet pesenan ajahnja, kenapa baroe sekarang ia njataken itoe, sedeng doeloenja ia manda sadja dipale pergi dateng oleh Japan? Dengen tjoema kasi tanda kibarken bendera Tjeng Thian Pek Djit belon boleh dibilang jang Chang Hsueh Liang soeda menganoet Sam Bin Tjoe Gie atawa menaloek pada angen-angen Kuomintang.
Bendera toeh melaenken satoe tanda, kapan maoe ia boleh lantas goeloeng kombali. Ini perkara oleh Chang Hsueh Liang roepanja tjoema dianggep seperti dagang, ia baroe maos kibarken bendera Tjeng Thian Pek Djit kaloe tawaran jang dibriken oleh pamerentah Nationaal ada tjoekoep menjenangken.
Begitoe poen pamerentah, asal sadja dengen officieel Manchurije soeda njataken menaloek, perkara oepah tida kenapa berlakoe lojar sedikit, maka begitoe lekas itoe pernjatahan menaloek dari Chang Hsueh Liang dioewarken, di itoe hari djoega pamerentah kaloearken besluit tetepken oepah jang dibriken pada Chang Hsueh Liang dan ia pcenja kontjo-kontjo.
Pemberesan tjara demikian soeda tentoe hasilnja ada koerang mempoeasken, tapi salaernja begitoe apa bisa dibikin ? Djalan apatah lagi bisa diambil? Dengen menaloeknja manchurije, pamerentah nationaal poenja kadoedoekan politiek djadi bertambah tegoeh, sebab di saloeroe tiongkok soeda menaloek di bawah kakoeasahannja pamerentah central.
Soeal persatoean inilah jang membikin pamerentah tida pandang tjape boeat beroeroesan sama chang hsueh liang aken boedjoek soepaja ia ini soeka hoeboengken diri dan salaennja itoe, ada lagi bebrapa hal jang minta soepaja soeal manchurije lekas dibikin beres dengen dami. Antaranja adalah perkara pembajaran poelang wagon-wagon dan locomotief-locomotief kreta api jang digondol ka fengtien koetika tentaranja chang tso lin merat sedari waktoe mana perhoeboengan kreta api di djoeroesan tientsin - pukow, peping- suiyuan, peping-hankow dan peping-fengtien djadi ampir mandek sama sekali.
Djika ini wagon-wagon dan locomotief tida lekas dibajar poelang, nistjaja karoegian jang ditanggoeng oleh negri boekan sedikit djoemblahnja, sedeng chang hsueh liang sendiri telah njataken jang itoe kreta api baroe bisa dibajar poelang sasoeda permoefakatan sama pamerentah national dapet kaberesan.
Demikianlah soepaja lebih gamberoeroesan dan tida menghalangken bagi pergaboengan, dengen conditie jang chang hsueh liang serta sekalian kontjonja boleh pegang tetap masing-masing poenja djabatan, pamerentah telah trima.
