Perasahan memikoel tanggoengan

DJIKALOE hendak didapetken kaberesan di dalem sasoeatoe organisatie, sasoeatoe goendoekan orang jang hidoep dan berkerdja sama-sama, boekan sadja pada pimpinannja moesti terdapet perasahan memikoel tanggoengan, tapi djoega pada sasoeatoe anggota.

Sebab achir-achirnja sang pemimpin toch tjoema telah diangkat atawa angkat dirinja sendiri goena kamoediken itoe organisatie dan boeat kapentingan dari anggota-anggota itoe organisatie. Maka itoe adalah kawadjiban dari sasoeatoe anggota aken lakoeken penilikan apa sang pemimpin ada berkerdja baek dan apa iapoenja kapentingan-kapentingan tida dibikin roegi.

Djikaloe satoe organisatie tida berdjalan baek, adalah kawadjiban dari orang-orang jang teritoeng padanja aken berdaja-oepaja boeat memperbaekin. Dan boeat bikin sasoeatoe anggota djadi mengarti adanja iapoenja kawadjiban dan soeka kaloearken tenaga atawa korbanken diri, ada perloe, bahoea ia merasa ada pikoel tanggoengan bagi kaberesannja itoe organisatie.

Ini hal mengenaken pada organisatie jang lebih keujil. sebagi perkoempoelan atawa familie, dan djoega pada organisatie jang lebih besar sebagi staat. Dalem satoe perkoempoelan jang dinamaken anggota adalah iapoenja lid, dalem satoe familie sanak-soedara dan dalem satoe negri rahajat. Bestuur dari satoe perkoempoelan ada pegang pimpinan dari itoe perkoempoelan, pamerentahan dari satoe negri moesti atoer kaberesan dalem itoe negri.

Tapi sering terdjadi bestuur perkoempoelan tida berkerdja baek, tida kasiken peritoengan lengkep tentang oewang jang ditrima dan dikaloearken, dan soeka lakoeken perboeatan-perboeatan jang ada bertentangan dengen kapentingan dari itoe perkoempoelan. Dalem itoe hal adalah kawadjiban sasoeatoe anggota dari itoe perkoempoelan aken preksa dengen terliti kasalahannja bestuur dan djikaloe itoe kasalahan-kasalahan berboekti aken lepas padanja dan angkat jang baroe, jang lebih bisa dipertjaja dan lebih tjakep.