Kapala terbang bangsa Mongolie
SinPo.id - Koran sin po edisi 23 oktober 1937 menerbitkan cerita penerbangan di Mongolia. Dalam laporanya Koran Sin Po menulis kemajuan penerbangan negara itu yang diawali kisah Shadyr Surun.
HIKAJAT dari panerbangan di Mongolie moelain dengen Shadyr Surun, barangkali djago terbang jang paling moeda dari doenia, jaitoe tjoema oesia 27 taon. Dalem iapoenja hari-hari pertama di mana-mana panerbangan ada satoe sport, satoe sport jang berbahaja.
Tapi laen sekali ada kamadjoean dari panerbangan di Mongolie. Ia tertjipta dari itoe kaperloean jang sanget boeat belaken itoe negri terhadep moesoe jang rakoes dan mengantjem. Panerbangan di Mongolie pertama - tama ada satoe sendjata, dan Shadyr Surun - jang pande sekali goenaken itoe sendjata dan anggota dari Raad Tinggi — ada salasatoe orang jang paling popular di Republiek Mongolie.
Personeel dari iapoenja eskader cedara, bersama-sama marika poenja istri, anak-anak dan iboe, marika poenja automobiel, koeda toenggang dan kambing, tinggal dalem yurts (goeboek jang bisa dipinda-pindaken dari bangsa Mongol) di deket lapangan terbang. Dalem marika poenja tempo senggang itoe toekang – toekang terbang pake marika poenja pakean kabangsahan dan toenggang koeda. Surun dan iapoenja familie djoega tinggal dalem satoe yurt.
Siapa jang bisa doega, dengen meliat itoe generaal moeda jang berpakean netjis di iapoenja medja toelis, sembari mendjawab pada banjak panggilan telefoon, atawa kasiken pengoendjoekan-pengoendjoekan pada iapoenja chef staf, bahoea di waktoe ia masi moeda, Surun tadinja hendak didjadiken hweesio? Dan toch ini ada betoel.
Sampe tiga taon jang laloe masi berlakoe itoe wet lama dari bangsa Mongool, bahoea anak lelaki jang soeloeng dari saban familie moesti dikasiken pada tempat pertapahan kaoem Boeddhist. Itoe wet sekarang soeda dirobah.
Anak lelaki jang paling toea moesti djalanken kawadjiban sebagi soldadoe, dan tjoema jang ka tiga boleh pergi bertapa. Sebagi anak oesia 5 Surun telah didjoeal oleh iapoenja orang - orang toea — menoeroet kabiasahan bangsa Mongool tentang „bagi” anak dengen sobat-sobat. Surun tida inget iapoenja orang toea. Tapi baek iapoenja iboe jang aseli dan iboe poengoet tinggal Bersama - sama ia dalem iapoenja yurt.
