Riwajatnja Anak Sultan Toerki
SinPo.id - Salah satoe radja jang paling kaja di doenia ada sultan Toerki di Constantinopel jang doeloe. Sultan terseboet mempoenjai anak lelaki jang sanget disajang, jalah prins Abdul Kadir, jang sekarang djadi samatjem ..........pengemis.
Di waktoe ketjil prins terseboet hidoep dalem astana besar di Constantinoep dan tida kenal laen dari kasenangan dan kaplesiran.
Oeroesan oewang ia tida oesa pikirken, sebab brapa sadja ia maoe pake atawa boewang, tentoe dikasi oleh ajahnja jang ”tjinta” padanja seperti ajah jang bodo biasa tjinta anaknja.
Tapi segala apa tida bisa kekal di ini doenia jang fana dan begitoepoen djoega di Toerki terbit revolutie di bawah pimpinan „pembrontak” Kemal Pasha jang sekarang djadi kapala dari Toerki jang baroe di Angora.
Sultan Toerki dipetjat dan djoega iapoenja anak, jalah prins Abdul Kadir dioesir.
Tapi ini tida terlaloe dipikirken oleh ini anak moeda jang biasa ditoeroetin sadja maoenja oleh ajahnja dan berboeat sasoekanja; itoe koetika oewangnja masi banjak dan ia pergi ngendon ka kota Boedapest dan hidoep setjara rojal sekali di Hotel Bristol bersama tiga istrinja (antara siapa ada prinses Medjide jang tjantik) dan laenlaen prampoean.
