Barang Barang Koeno Dari Brons
SinPo.id - Antara barang-barang koeno Tionghoa, barang-barang jang terbikin dari brons ada jang tersimpen paling awet, lantaran brons tida bisa petja sebagi barang-barang dari porselein.
Ilmoe membikin barang-barang dari brons ada satoe ilmoe jang toewa sekali dari bangsa Tionghoa. Sampe sekarang masi ada tjonto-tjonto dari barang brons Tionghoa koeno dari djeman Chou (1122 — 255 sabelonnja Jezus terlahir) dan djeman Shang (1766—1122 sabelonnja Jezus).
Menoeroet katanja kitab Shu Ching itoe sembilan ”Tripods” jang terkenal ada lebih toewa lagi, jalah berasal dari Hsia dynastie (Hee Tiauw).
Djoembla barang-barang brons koeno semingkin lama boekan semingkin sedikit, tapi sebaliknja semingkin bertamba.
Banjak barang-barang brons koeno jang terpendam di tanah, dan semingkin banjak orang menggali semingkin banjak jang dikatemoeken kombali.
Menoeroet bangsa Tionghoa sendiri poenja pendapetan barang-barang brons dari djeman Hsia, Hsiang dan Chou moesti dipandang sebagi jang paling bagoes.
Banjak sekali boekoe-boekoe jang toetoerken halnja barang-barang brons dengen teliti; sala satoe boekoe jang paling terkenal tentang brons ada Po Ku T u jang diterbitken dalem djeman Sung..
Barang-barang koeno dari brons boekan sadja disoeka lantaran indahnja, tetapi lantaran banjak antaranja jang teroekir dengen hoeroef-hoeroef Tionghoa model jang paling toewa.
