General Store Paling Besar Di Doenia

Koran Sin Po edisi 6 Agustus 1932 melaporkan tentang toko penjualan kebututuhan besar, H. Gordon Selfridge, di Oxford Street dengan kelengkapan kebutuhan publik.

Laporan koran Sin Po itu menunjukan perdagangan dunia sedang tumbuh, ketika public harus dikenalkan sebuah toko di Amerika kala itu

SinPo.id -  GENERAL store, atawa toko jang ketengin segala roepa toarang, jang paling besar adanja boekan di Amerika tapi di London, tjoema sadja eigenaarnja ada orang Amerikaan, jalah H. Gordon Selfridge, dan itoe general store di Oxford Street poen terkenal dengen iapoenja nama. Ini toko ada begitoe lengkep hingga di sitoe orang bisa beli postzegel toea atawa djoega aeroplane, pendeknja segala roepa kaperloean manoesia. Dan itoe toko ada begitoe besar hingga iapoenja perdagangan dalem satoe taon, maski kabanjakan ada etjeran, ada berdjoemblah $ 50.000.000. Maski dalem ini moesim malaise, Selfridge poenja general store katanja senantiasa rame dan bikin banjak pendjoealan. Dalem taon 1931 itoe general store malah soeda bisa dapetken 400.000 langganan baroe. Begitoelah Gordon Selfridge maski soeda ada oemoer tapi iapoenja napsoe boeat besarken dan loeasken peroesahannja tetap goembira seperti orang moeda. Sekarang kabarnja ia lagi loeasken iapoenja store dengen 20 atawa 25 millioen dollar lagi, dan moesti mengambil tempo delapan taon.

Selfridge poenja store soeda djadi begitoe besar dan madjoe boekan tjoema lantaran adanja, di London jang mempoenjai toedjoe millioen lebih pendoedoek dan djoega boekan lantaran Selfridge  ada poenja banjak kapitaal, tapi teroetama lantaran Selfridge ada saorang jang bisa goenaken ideeidee baroe boeat memadjoeken peroesahannja.

Selaennja begitoe ia ada saorang jang bisa bekerdja oelet, tida maoe kalah mentahmentah, dan katahoei principeprincipe jang paling penting dalem pengoesahan satoe general store.