Orang jang paling hartawan
SinPo.id -Ada banjak jang baranggepan bahoea Sir Mir Osman Ali, Nizam dari Hyderabad, ada orang jang palling hartawan di doenia. Ini Nizam ada tersangkoet familie sama Mogül-Magul jang terbesar jang biasa mamerentah di India di djeman doeloe. Lebih djaoe ia ada toeroenan direct dari Aboe Bakar, mertoeanja Nabi Mohammed dan Khalif jang pertama sadjek itoe nabi meninggali doenia. Ini sadja soeda tjoekoep boeat bikin ini Nizam poenja kadoedoekan djadi tinggi dan termoelia. Tapi selaennja begitoe ia ada orang jang mamerentah dari satoe Staat separo merdika jang nummer doea paling besar dan nummer satoe paling kaja di India. Hyderabad jang besarnja ampir seperti Groot Brittannie ada memponjai pendoedoek 14 millioen, 'jang sebagian besarnja ada berigama Hindoe, samentara ini Nizam dan orang orang bangsawannja jang teroetama berigama Islam.
Sir Wiilliam Barton, jang perna djadi Resident di Hyderatoad, ada anggep ini Nizam ada orang jang Paling hartawan di doenia. Iapoenja kekajahan ada begitoe besar hingga banjak milionnair Amerikaansch djadi kaliatan miskin djika dibandingken padanja. Laipoenja barang-barang permata sadja — inten, rabijn, smaragd dan sebaginja — katanja ada berharga 150,000,000 dollar. Ia ada itoe orang jang kaloe maoe bisa pake kantjing-kantjing badjoe dari batoe-batoe mirah jang paling bagoes sasoeatoenja berharga poeloehan riboe. Djoega ia ada poenja banjak tanah, bazaar-bazaar, roemah-roemah dan banjak oewang mas dan mas geloentoengan, sedeng iapoenja gadji dari staat ada $ 5000 satoe hari.
Sir Mir Osman Ali, Nizam dari Hyderabad
Tapi maskipoen ia ada mempoenjai kekajahan jang begitoe besar, dan maski soeda mamerentah 24 taon lamanja, ia tida soeka oendjoskin diloear kekajahannja. Samentara iapoenja orang-orang bangsawan berkandaran auto Inggris jang mahal jang dilapis perak, ini Nizam tjoema pake auto jang sedeng sadja boeatan Amerika. Sebagi orang Moeslimin jang alim, ia toentoet pengidoepan jang himat. Ia masi teroes tinggal dalem roemah bungalow bekas orang toeanja. Ia pelihara banjak koeda boeat iapoenja anak-anak lelaki, sedeng ia sendiri tida soeka toenggang koeda. Kabanjakan prins di Hindia soeka nembak, tapi ini Nizam tjoema soeka nonton perlombahan koeda.
Tapi ia boekan orang moeris. Tatkala orang-orang Moeslimin di London hendak diriken mesigit di itoe iboe kota Inggris, ia lantas kasi derma 175,00'0 dollar. Waktoe djarang-djarang ia koendjoengin Delhi, iboe kota British India, ia tinggal dalem astana jang ia diriken boeat itoe maksoed. Boekan tjoema begitoe, tapi ia adjak iapoenja antero harem dan boedjang-boedjang ——sama sekali 200 orang — dan angkoet marika dengen speciaal trein. Iapoenja istri, Dhulan Begum Saheba, pergi ka Mekkah di ini taon. Boeat ini ia pasti pake ongkos jang besar sekali.
Banjak onta, gadjah, truck dan auto digoenaken njebrang padang pasir boeat ini maksoed. Itoe caravan besar diperlengkepin dengen segala kaperloeannja, teritoeng djoega machine boeat panerangan electrisch. Iapoenja istri disediaken makanan speciaal dalem itoe perdjalanan. Lebih djaoe satoe astana sengadja didiriken di Mekkah boeat sang istri tinggal.
Boeat menjotjokin iapoenja kadoedoekan tinggi dalem doenia Moeslimin, ini Nizam soeda atoer pernikahan jang satimpal bagi iapoenja anak-anak lelaki. Satoe poetranja telah menikah dengen poetrinja bekas Sultan Turkije, dan jang satoenja lagi menikah dengen satoe nicht. Pada itoe bekas Sultan poenja familie ia kasi gadji 20,000 dollar satoe taon. Ini Nizam dapet perindahan besar dari pamerentah Inggris dan mempoenjai hak dikasi slamet dengen 21 tembakan meriam.
