Tiongkok 13 September 1924
SinPo.id - Chekiang dan Kiangsu.
Paperangan jang teiah dimaloemken antara ini doea provincie dalem bebrapa hari jang telah liwat belon bisa mengasi pemandangan jang betoel fihak mana sabenarnja ada lebih banjak kans aken menang, maski kabar-kabar kawat ada wartaken jang tentaranja Generaal Lu Yung Hsiang telah dapet kamenangan sebab perklaian ini baroe ada permoelahan sadja dan kamenangan-kamenangan itoe tida brapa besar artinja. Kaloe dioekoer dari djoemblanja kadoea fihak poenja tentara, memang Kiangsu ada poenja lebih banjak laskar perang dari pada moesoenja, tapi dalem paperangan boekan banjaknja djoembla soldadoe jang boleh diandelken, hanja jang paling oetama adalah kapandean officier-officier jang pimpin itoe tentara dan kasampoernahannja marika poenja alat perang. Dalem ini doea punt poen Chekiang tiada ada di bawah Kiangsu, kerna Chekiang ada poenja satoe fabriek sendjata di Shanghai sedeng officierofficier jang pimpin tentara Chekiang ada banjak orang-orang militair jang terpeladjar di Japan dan Academy di Paoting, maka kaloe zonder dapet bantoean dari laen kawannja, belon tentoe Kiangsu bisa tahan berhadepan satoe sama satoe dengen moesoenja.
Kaloe bisa didjalanken moeslihat seperti apa jang Wu Pei Fu soeda atoer, nistjaja Chekiang dari ampat pendjoeroe bisa dikoeroeng oleh moesoe, tapi boeat lakoeken itoe pengoeroengan Kiangsi dan Anhui barangkali tida bisa berboeat banjak berhoeboeng sama keadahan dalem itoe doea provincie sendiri jang tida begitoe aman serta tenaga marika jang tida begitoe koeat. Jang bisa bantoe meringanken pakerdjahannja Kiangsu melaenken Generaal Sun Chuan Fang dari Hoktian jang ada merdika aken bawa tentaranja ka mana ia soeka.
Dr. Sun Yat Sen.
Tapi ini desekan dari Hokkian Generaal Lu Yung Hsiang boleh troesa terlaloe kceatirken, sebab Dr. Sun Yat Sen dari Canton telah siapken tentaranja aken madjoe ka Oetara, boeat mana ia misti ambil sala satoe djalan, jaitoe melintasin Kiangsi ataw Hokkian. Bila ia ambil djalan dari Hokkian soeda tentoe Generaal Sun Chuan Fang tida poenja kasempetan boeat berklai di Chekiang, dan sekali poen Dr. Sun menoblos di Kiangsi djoega ini gerakan bisa menghalangin ia poenja maksoed; tjoema apa betoel Dr. Sun soeda pasti aken pimpin sendiri tentaranja ka Oetara, ini belon bisa ditetepken/ sebab kaloe ia benar-benar tinggalken, Canton, apatah Chen Chiung Ming nanti tinggal diam, tida goenaken itoe koetika jang baek boeat bikin penjerangan? Betoel, seperti soerat-soerat kabar di Hongkong wartaken, bahoea Dr. Sun tida aken bawa semoea tentaranja, hanja ia tinggalken pasoekan Yunnan dan Kwangsi boeat lindoengken Canton dari serangan moesoe, tapi misti disangsi jang pasoekan ini sanggoep tangkis serangan tentaranja Chen Chiung Ming jang djoemblanja ada lima poeloe riboe djiwa.
Ini ada satoe kans jang baek aken Dr. Sun pentang pengaroenja ka loear Canton, maka paling baek sekarang sabrapa boleh haroes dibikin perdamian sama Chen Chiung Ming soepaja ia poenja gerakan tida mendapet halangan lagi.
Bantoean dari Feng Tien
Menilik keadaan diatas, bantoean dari Dr. Sun kaliatan tida berpengaroe besar bagi djalannja paperangan, jang paling besar harganja bagi Chekiang di ini waktoe adalah bantoean jang ia dapet dari Fengtien, dimana Chang Tso Lin telah njataken perang pada Peking dan Wu Pei Fu, sebab gerakannja ini „Radja dari Mantsjoerie” ada djadi rintangan besar bagi Peking dan Wu Pei Fu aken kirim tentaranja ka Selatan, kerna ini moesoe jang soeda tiga taon poenja lama bekerdja kras boeat tegoeken Angkatan perangnja goena tjoetji itoe kemafejean jang didapet dari kaoem Chihli, sekarang tida boleh dipermaenken sebagimana doeloe lagi: Sedjak mendapet itoe poekoelan dari Wu Pei Fu, Chang Tso Lin lantes mendoesin dan telah robah organisatie tentaranja, dan sedari itoe waktoe ia senantiasa toenggoe datengnja tempo boeat membales sakit hatinja. Sekarang tempo jang ia toenggoe soeda sampe, dan satoe pasoekan modern jang teralat lengkap serta tjoekoep kakoeatan financie dan tertoendjang oleh pasoekan oedara tegoe, ini boekan ada satoe moesoe jang boleh dipandang enteng.
Keadaan ini ada dikatahoei djoega oleh fihak Chihli, maka tentara Chihli jang terpeladjar paling sampoerna, baek jang ada di Peking maoe poen jang ada di Loyang, tida dikirim boeat tempoer moesoe di Selatan, hanja disediaken boeat samboet Chang Tso Lin poenja kadatengan. Party-party jang anti kaoem Chihli soeda toempaken tenaganja boeat bikin perlawanan di Selatan dan oetara-timoer, sekarang orang tinggal awasken apa anti Chihli party di Selatan-barat tida lantas bergerak djoega.
