Tida rasaken malaise

Laporan: Sinpo
Senin, 16 Januari 2023 | 13:12 WIB
Koran Sin Po, 16 Januari 1932  (Monash University/SinPo.id)
Koran Sin Po, 16 Januari 1932 (Monash University/SinPo.id)

Di waktoe crisis economie begini heibat dan depressie perdagangan begini keras di sasoeatoe bagian dari doenia oemoemnja orang ada rasaken. soeker, tapi kabarnja tida demikian dengen kebanjakan pendoedoek di Mexico.

Orang Mexico tida terlaloe rasaken kasoekeran oewang dalem ini moesim soesa, lantaran oewang tida dipandang terlaloe penting oleh kebanjakan orang di Mexico. Mr. Stuart Chase baroe ini telah terbitken iapoenja boekoe tentang Mexico dalem mana ada ditoetoerken pendoedoeknja itoe negri poenja sifat-sifat jang berbeda djaoe dari orang Amerikaan.

Sedikit taon berselang Mr. Chase poenja sobat dapet concessie tanah boeat peroesahan tani di satoe tempat di Mexico. Gadji koeli tani di itoe tempat jalah 25 centavo satoe hari, tapi Mr. Chase poenja sobat jang menaro banjak sympathie pada kaoem boeroeh anggep itoe gadji terlaloe ketjil dan ia rasa kaoentoengan masi tjoekoep boeat bajar koeli 50 centavo satoe hari.

Begitoelah di achirnja satoe minggoe ia sengadja bikin kaget iapoenja koeli-koeli dengen bajaran dubel. Tentoe sadja sasoeatoe penggawe kaliatan girang, tapi adalah di hari Senen Mr. Chase poenja sobat dapet gilirannja dibikin kaget, kerna waktoe pintoe gerbang diboeka tida ada satoe koeli jang moentjoel, hingga pakerdjahan moesti ditoenda. Achirnja ternjata koeli-koeli tani dengen bajaran 25 centavo satoe hari dapet penghasilan jang tiba tjoekoep boeat idoep, tapi kerna bajarannja dibikin dubbel ini ada tjoekoep boeat marika idoep doea minggoe, dari itoe di minggoe kadoea marika tida merasa perloe boeat masoek kerdja. Mr. Chase poenja sobat terpaksa toeroenken lagi bajaran 25 centavo satoe hari, dan tjoema dengen ini djalan katanja ia bisa selaloe dapet tjoekoep penggawe. Satoe toekang kajoe di Mexico City ada kerdjaken bebrapa lemari boeat saorang prampoean.

Tatkala Pakerdjahannja soeda selese dan berlaloe, itoe prampoean dapet liat masi ada lagi laen kerdjahan boeat itoe toekang. Dalem tiga minggoe itoe prampoean tida bisa tjari itoe toekang kajoe dan tatkala katemoe ia laloe tanja: „Kenapah kaoe tida dateng lagi, sedeng akoe masi ada oetang 5 peso boeat kerdjahan laen?” Itoe toekang djawab: „Kaloe akoe dateng nistjaja kaoe anggep akoe maoe dapetken itoe oewang." Mr. Chase satoe masa beli courant dari satoe newsboy di satoe station di Mexico dan zonder preksa lagi ia kasi satoe oewang jang ia rasa ada nickel dari lima centavo.

Tatkala trein moelai brangkat ia dapet liat itoe anak mengoeber itoe trein sambil angkat tangannja. Itoe anak boekan lari boeat minta lagi oewang tapi boeat kasi kombali 15 centavo lantaran ia soeda trima lebih.

Orang Indian di Mexico biasa bikin piring mangkok jang marika bawa sendiri boeat didjoeal di pasar. Dari marika poenja tempat tinggal di goenoeng pergi ka pasar di kota sambil bawa banjak piring mangkok boekan ada satoe pakerdjahan jang enteng. Tapi djika orang tjoba tjegat di djalanan saorang Indian jang gendong piring mangkok boeat minta beli dengen harga jang itoe pendjoeal niat djoeal di pasar, katanja djangan harep itoe permintahan bisa diloeloesken.

Itoe orang Indian boekan tida taoe bawa oewang di kantong ada lebih enteng dari gendong piring mangkok di blakang, tapi tentang kasi liat iapoenja barang-barang di pasar ia anggep ada satoe kasenangan, dan iapoenja sasoeatoe barang dagangan ada poenja tjerita.sinpo

Komentar:
BERITALAINNYA